ОХУ-ын Засгийн газрын тэтгэлгээр тус улсад суралцаж буй монгол оюутнуудын Ажлын хэсгээс "Ногоон коридор" үйл ажиллагааг өнөөдөр ОХУ-ын Шинжлэх ухаан, соёлын төвтэй хамтран зохион байгууллаа.

Дэлхий нийтийг хамарсан цар тахлын нөхцөл байдлаас үүдэн гадаад улс оронд сурах оюутан залуус их, дээд сургуульдаа сүүлийн 2 жил цахимаар суралцаж буй. Монгол Улсаас ОХУ-д 2020-2021 онд суралцах болон дипломоо хамгаалах төгсөх дамжааны оюутнууд Орост биеэр очин суралцах шаардлагатай байгаагаа илэрхийллээ. 

Улмаар энэ талаар мянга гаруй оюутан гарын үсэг зурж, ОХУ-ын хамтын ажиллагааны "Россотрудничество" агентлагт хүсэлт тавин уламжилсан юм. Ингэснээр ОХУ-д суралцах оюутнуудыг хил нэвтрүүлэх ажлыг “Ногоон коридор” нэрийн дор эхлүүлжээ. Тэдний хүсэлтийг "Россотрудничество" агентлаг хүлээн авч дэмжиж буйгаа ОХУ-аас Монгол Улсад суугаа Элчин сайдын зөвлөх, "Россотрудничество" агентлагийн Монгол Улс дахь төлөөлөгч А.Р.Базархандаев илэрхийлэв.

Энэ талаар тэр хэлэхдээ, “Цар тахлын улмаас манай 2 орны хил хаалттай байгаа энэ үед зарим оюутан сургуульдаа нэг ч удаа очиж үзээгүй, оюутнууд тухайн улсдаа суралцаж чадахгүй байгаа нь харамсалтай. Оюутнуудын гаргасан санаачилгыг дэмжин өнөөдөр та бүхний дуу хоолойг хоёр орны Засгийн газрын түвшинд сонордуулахын тулд оюутан залууст тулгамдсан асуудлыг шийдэж, хоёр улс хоорондын “Ногоон коридор” үүсгэх ажиллагааг хамтран зохион байгуулж байна" гэв. 

Тэрээр, "Оюутан залуусын дуу хоолойг сонсох нь бидний Монгол улсад явуулж байгаа үйл ажиллагаатай шууд холбоотой. Учир нь дэлхийн 87 оронд байгаа "Россотрудничество" төлөөлөгчийн газар, ОХУ-ын тэргүүлэх их дээд сургуулиудын нэр төрийн хэрэгтэй холбоотой учраас та бүгдийг ОХУ-д очиж суралцахыг дэмжиж байгаагаа илэрхийлье” гэв.

“Ногоон коридор” үйл ажиллагааны нээлтэд Монгол Улсын ГХЯ, БШУЯ, ЗХУ-ОХУ-д их дээд сургууль төгсөгчдийн МАВСУЗ холбоо, Гадаадад төгсөгчдийн нэгдсэн зөвлөл, “Хилийн чанад дахь монголчуудын зөвлөл” ТББ болон оюутнууд, эцэг эхийн төлөөлөл ирж оролцлоо. Мөн хөдөө орон нутгийн 300 оюутан цахимаар холбогдож санал бодлоо илэрхийлсэн юм. 

ОХУ-д суралцах оюутнуудын төлөөлөл 600 орчим оюутан бичгээр санал хүсэлтээ илэрхийлж, хичээлийн шинэ жил эхлэхээс өмнө энэ асуудлыг шийдвэрлэж өгөхийг хүсэж, эрсдэл гарсан үед хариуцлагаа өөрсдөө хүлээнэ гэдгээ илэрхийлжээ. Тэд 7 дугаар сарын 23-нд эхний бичгээ хүргүүлсэн байна. ГХЯ-ны Консулын хэлтсээс оюутнуудын төлөөллийг хүлээн авч уулзжээ. Өнөөдөр гарын үсгээ зурж, явах хүсэлтээ гаргасан оюутнууд КОВИД-19-ийн эсрэг вакциндаа бүрэн хамрагдаж, зардал болон гарах бүх эрсдлийг өөрсдөө даахад бэлэн байгаа гэж зохион байгуулагч оюутнууд хэлж байв. Өнөөдөр болсон үйл ажиллагааг ОХУ-ын хэвлэл мэдээллийн томоохон байгууллагууд анхаарч, "Россия-24" телевизээр шууд дамжуулсан юм.

Ташрамд мэдээлэхэд, ОХУ-ын Засгийн газрын тэтгэлэгт 2020 онд 550, энэ онд 510 монгол оюутан хамрагдаад байна. Манай улсаас нийт 4000 гаруй оюутан ОХУ-д суралцаж байна.

Эх сурвалж: Montsame.mn