Улсын Онцгой комиссын өчигдрийн хуралдаанаар халдвар тархах өндөр эрсдэл бүхий үйл ажиллагааны төрөл гэж үзэж бялдаржуулах төв, саун, бассейн, фитнесийн үйл ажиллагааг 10 хоног зогсоохоор болсон. Мөн бүх төрлийн ресторан, кофе шопуудын заалаар үйлчлэхийг хориглосон шийдвэрийг дахин 10 хоногоор сунгах шийдвэр гаргасан.
Уг шийдвэрийг эсэргүүцэж өнөөдөр ресторан, кофе шоп зэрэг үйлчилгээний байгууллагуудын зүгээс мэдэгдэл гарган халдвар хамгааллын дэглэмээ сайтар баримтлан цаашид үйл ажиллагаагаа хэвийн үргэлжлүүлэх болсноо цахим орчинд илэрхийлсэн байна.
Гэтэл энэ санаачлагыг эхлүүлсэн "Takesan Miso Ramen" рестораны үйл ажиллагааны менежерийг Сүхбаатар дүүргийн цагдаагийн хэлтсээс баривчлан авч явжээ.
Энэ талаар тухайн рестораны цахим хуудсанд "Манай үйл ажиллагаа хариуцсан менежерийг Сүхбаатар дүүргийн цагдаа нар баривчлан авч явлаа.
Гаргасан мэдэгдэлдээ бат зогсож үйл ажиллагаагаа хэвийн явуулж тэмцлээ үргэлжлүүлэхээ үүгээр уламжлахын сацуу биднийг дэмжиж байгаа хувь хүмүүс албан байгууллага, хэвлэл мэдээллийнхэн ирж хамтдаа нэгдэн дуу хоолойгоо хүргэхийг уриалж байна.
Цагдаа, мэргэжлийн хяналт, УОК-хон ирж хааж, бүтүүмжлэх гэж оролдсон ч бид 24:00 цаг хүртэл ажиллах тул манайхаар үйлчлүүлж байнга хүнтэй байлгаж ухамсартайгаар эсэргүүцлээ илэрхийлнэ үү хэмээн хүсэж байна.
Үйлчлүүлэгч та хүн болон ширээ хоорондын зайгаа барин халдвар хамгааллын дэглэмээ сайтар сахиж биднийг дэмжинэ гэж итгэж байна" гэсэн байна.
