"Зуун жилийн яруу алдар, зузаан найрамдлын гэрч” Хятад, Монголын хэвлэл мэдээллийн хамтарсан цахим сурвалжлагын арга хэмжээ өнөөдөр нээлтээ хийлээ. 

БНХАУ-ын Коммунист нам байгуулагдсаны 100 жилийн ой тохиож буйтай холбогдуулан Монгол Улсын хэвлэл мэдээллийн байгууллагуудтай хамтран Хятад, Монголын найрамдлын хэлхээ холбоо болон ажил хэрэгч хамтын ажиллагааг олон нийтэд таниулах зорилгоор хоёр улсын хэвлэл мэдээллийн хамт олон хамтарсан цахим сурвалжлагын арга хэмжээг зохион байгуулах юм. 

Нээлтийн арга хэмжээнд ӨМӨЗО-ны Ардын засгийн газрын хэвлэлийн албаны дарга Хань Юньшян, Монголын Сэтгүүлчдийн Нэгдсэн Эвлэлийн ерөнхийлөгчийн үүрэг гүйцэтгэгч З.Боргилмаа нар оролцож үг хэллээ.

МСНЭ-ийн Ерөнхийлөгчийн үүрэг гүйцэтгэгч З.Боргилмаа "Стратегийн иж бүрэн түншлэлийн харилцаатай хөрш орны хувьд харилцаа, хамтын ажиллагааны бүхий л шатанд үнэн бодит мэдээлэл бол хамгийн чухал суурь нь билээ. Аливаа мэдээлэл баттай, бодитой, үнэн, шуурхай байх нь өнөөдрийн болон цаашдын харилцаа, хамтын ажиллагааны амжилт, үр өгөөжийн үндэс. Тийм ч учраас мөнхийн хөрш орнууд, ард түмнүүдийн харилцаа, хамтын ажиллагаа, найрамдал нөхөрлөлийг бэхжүүлэхэд хэвлэл мэдээллийн хамтын ажиллагаа үргэлж чухал байсаар ирсэн. Цаашид ч тийм байх болно гэдэгт итгэлтэй байна.

Сүүлийн арван жилд МСНЭ болон Бүх Хятадын Сэтгүүлчдийн холбоо, ӨМӨЗО-ны Ардын Засгийн газрын Хэвлэл мэдээллийн албаны хамтын ажиллагаа тасралтгүй өргөжиж, хоёр талд жил бүр ээлжлэн Хэвлэл мэдээллийн форумыг тогтмол зохион байгуулж, сэтгүүлчдийн туршлага солилцох, суралцах, улмаар хамтарсан сурвалжлага бэлтгэх зэргээр үйл ажиллагаагаа улам бүр өргөжүүлэн ажиллаж ирлээ.

Хятадын коммунист намын 100 жилийн ойн хүрээнд Хятад улсын өнөөгийн хөгжил, хүмүүсийн аж амьдрал, иргэдээ ядуурлаас гаргасан сайн туршлага зэргийг сурталчлан таниулах зорилгоор ӨМӨЗО-ны Ардын Засгийн газрын Хэвлэлийн албанаас санаачлан хамтран зохион байгуулж буй цахим сурвалжлагад Та бүхнийг урьж байна.

Сайн мэдээлэл бол сайхан харилцаа, сайн хамтын ажиллагааны эхлэл юм. Хоёр орны харилцаа, хамтын ажиллагаа улам бүр өргөжин тэлэх болтугай. Өнөөдрийн арга хэмжээнд оролцож буй хүн бүхэнд, түүнчлэн мэргэжил нэгт сэтгүүлч нөхдөдөө, амжилт хүсье" гэсэн юм. 

Тус арга хэмжээ Зургаадугаар сарын 22-ноос 29-ны хооронд үргэлжлэх бөгөөд Өвөр Монголын Баяннуур, Ордос, Ухай хотоор аялан цахим сурвалжлага хийж, ядуурлаас ангижруулах, байгаль орчныг нөхөн сэргээх, соёл аялал жуулчлал, орчин үеийн хөдөө аж ахуйн хөгжил, эко бүтээгдэхүүний үйлдвэр зэрэг олон салбарын хөгжил, ололт амжилтын талаар дэлгэрэнгүй мэдээлэлтэй танилцах боломжтой юм.

Хамтарсан сурвалжлагын арга хэмжээнд Монгол улсаас Монцаме агентлаг, “Зууны мэдээ сонин”, UBS телевиз, TV2, TV8, FM 107.5 болон zindaa.mn, iNews.mn, livetv.mn, mass.mn, mglnews.mn, infomongol.mn зэрэг 10 гаруй хэвлэл мэдээллийн байгууллагууд оролцож, сурвалжлага хийх юм.

Харин Хятад улсын талаас Синьхуа агентлагийн монгол хэлний сайт, ХТРТ-ийн монгол хэлний сайт, Өвөр Монголын Өдрийн Сонины Солонго мэдээний төв, Өвөрмонголын Радио телевизийн “Талын дуу хоолой радио”, ӨМ-ийн Одон телевиз оролцож байна.