Боловсрол, шинжлэх ухааны яамнаас 2021 оны Элсэлтийн ерөнхий шалгалтын талаар мэдээлэл өглөө.
Боловсролын үнэлгээний төвийн ахирал Л.Ганбат "Өмнөх оны төгсөгчдөөс 8,000 гаруй хүн шалгуулахаар бүртгүүлсэн байгаа. Өмнө нь ийм хэмжээний тоо гарч байгаагүй учраас учир шалтгааныг тодруулахаар судалгаа хийж байна. 2020 онд шалгалт өгөөд босго оноо нь хүрээгүйгээс шалтгаалж, дахин шалгалт өгч байх магадлалыг мөн шалгаж байна. Насны ангиллыг авч үзвэл хамгийн дээд тал нь 58 настай нэг хүн байна. Мөн 30-40 настай зэрэг олон жилийн өмнөх төгсөгчид ихээхэн бүртгүүлсэн. Тиймээс хувь хүний сонголт байх магадлал бий. Манай төвөөс судалгааг энэ долоо хоногт багтаан авч дуусна" гэлээ.
Харин Их, дээд сургуулийн босго онооны талаар БШУ-ы сайд Л.Энх-Амгалан "Энэ онд Их, дээд сургуульд элсэх босго оноо нь 480 байна. БШУЯ-наас тогтоосон босго оноог их, дээд сургуулийн консерциум дур мэдэн буулгаснаас, ЭЕШ өгөөгүй байхад нь оюутан элсүүлснээс болж, 7,200 оюутны асуудал яригдаж байна. Олон хүүхэд, эцэг эхчүүдийн хохироож буй бодит нөхцөл байдал үүссэн тул салбарын хэмжээнд зөв шийдэл олохын төлөө ажиллана. Хариуцлага алдсан их, дээд сургуулийн удирдлагуудтай хатуу хариуцлага тооцохын зэрэгцээ төлбөрөө төлөөд 2, 3 дугаар курст суралцаж буй оюутнуудад дахин боломж олгох ёстой гэж үзсэн" гэлээ.
