Эрдэнэт хотын 50 жилийн ойд зориулан бүтээсэн түүх, соёлын бүтээлүүдийг аймгийн Соёлын байгууллага, ерөнхий боловсролын сургуулийн номын сан, музей, Нийтийн номын сан болон хэвлэл мэдээллийн байгууллагуудад өнөөдөр хүлээлгэн өгчээ.

Эрдэнэт хотын 50 жилийн ойд зориулан түүхэн боть ном, “Эрин зууны бахархал Эрдэнэт” уран зураг, гавьяат уран бүтээлчдийн дуулсан Эрдэнэт хотын сүлд 12 дуу бүхий пянз, мөн хотын зохиолч, яруу найрагчдын бүтээлийн дээжийг хүргүүлсэн байна.

50 жилийн ойн ажлын багийн дарга Б.Оюун-Эрдэнэ энэ үеэр “50 жилийн тэртээ эх орны өнцөг булан бүрээс ирсэн залуусын сэтгэл, хүч, хөдөлмөрөөр бүтсэн хотынхоо түүхийг ном, баримтат кино, уран зураг, пянз зэрэг бүтээлээр мөнхөлсөн нь ирээдүй хойч үед өвлөгдөх соёлын үнэт өв юм. Эрдэнэтийн түүх үргэлжлэх ёстой, энэ түүхийг түгээн дэлгэрүүлж, иргэд, хүүхэд, залуус хотынхоо түүхээр бахархдаг байх учиртай” гэлээ.

Аймгийн ИТХ-ын Нарийн бичгийн дарга Ш.Ганболд Эрдэнэт хотын 50 жилийн түүхийн боть номыг баримт, эх сурвалжид тулгуурлан бүтээснийг онцоллоо. Тэрбээр уг ном нь цаашид судлаач, багш, сурагчид болон нийт иргэдэд үнэ цэнтэй эх сурвалж болно гэв.

Мөн энэ үеэр Дэлхийн шатрын 44 дүгээр олимпиадын аварга, ОУХМ Б.Мөнгөнзулын гарын үсэгтэй шатрын хөлгийг аймгийн музейд хадгалууллаа.

Эдгээр бүтээлийг номын сан, музей, соёлын байгууллага болон хэвлэл мэдээллийн байгууллагуудад хүргэснээр иргэд, хүүхэд, залуус Эрдэнэт хотын түүх, бүтээн байгуулалт, соёлын өвтэй танилцаж, судлах боломж бүрдэх юм.