/TASS/ Видео тоглоомын дэлхийд хамгийн том үзэсгэлэнгүүдийн нэг болох "Tokyo Game Show" (TGS) 30 дахь жилдээ Японы Чиба мужид албан ёсоор үүдээ нээлээ.

2026 онд энэ удаагийн үзэсгэлэн "Төгсгөлгүй тоглоомын хамгийн урт таван өдөр" хэмээх уриан дор түүхэндээ анх удаа бүтэн таван өдрийн турш үргэлжилнэ. Зохион байгуулагчдын мэдээлснээр, энэ онд TGS-д тоглоомын салбарын нийт 1138 төлөөлөгч оролцож, 4000 гаруй үзэсгэлэнгийн талбай ажиллуулж байгаа нь өнгөрсөн оны дээд амжилтыг давтжээ. Үзэсгэлэнд Японы 540, гадаадын 598 компани тоглоом болон хамгийн сүүлийн үеийн шинэ бүтээгдэхүүн, технологио танилцуулна.

Уламжлал ёсоор Японы “Capcom”, “Koei Tecmo”, “BANDAI NAMCO”, “Square Enix” зэрэг компаниудын үзэсгэлэнгийн талбай олны анхаарлыг хамгийн их татах төлөвтэй байна. Тухайлбал, тоглоом сонирхогчид “Square Enix” компанийн “Final Fantasy VII” тоглоомын шинэчилсэн гурвалсан цувралын төгсгөл хэсгийн демо хувилбарыг танилцуулахыг хүлээж байна.

TGS-ийн үзэсгэлэнгийн бараг бүх талбайд зочид хөгжүүлэгч компаниудын танилцуулж буй шинэ тоглоомуудыг үзээд зогсохгүй өөрсдөө туршиж үзэх боломжтой. Үзэсгэлэн есдүгээр сарын 21 хүртэл үргэлжилнэ. Эхний хоёр өдөр зөвхөн сэтгүүлчид, тоглоомын салбарын ажилтнууд болон контент бүтээгчдийг нэвтрүүлэх бөгөөд бямба гаригаас бүх хүнд үүд хаалгаа нээнэ.