Баруун 4 замаас Саппорогийн уулзвар хүртэлх явган хүний замын ажил үндэсний үйлдвэрлэгч ТАСО ХХК-ний гүйцэтгэлээр хийгдэж байгаа ч наймдугаар сарын 13-ны шөнийн 23:00 цагт шинэ хучилтын хэсэгт хүнд даацын хоёр машин орж, явган зам эвдэрсэн явдал гарлаа.

Үндэсний үйлдвэрлэгч ТАСО компанийн ерөнхий захирал Т.Отгонбаяр хэлэхдээ, тухайн шөнийн 23:00 цагт хийж дуусгасан явган замыг хатааж бэхжүүлэх зорилгоор хаалт тавьсан боловч хүнд даацын хоёр машин зоригтойгоор зам руу орж, 189 ам метр талбайд 90 чулуун хавтан хагарч эвдэрсэн байна. Түүнчлэн автобусны буудлын зам хүртэл зориудаар гэмтсэн байж болзошгүйг бичлэгээр нотолжээ. Тиймээс ТАСО компани маргааш цагдаагийн байгууллагад албан ёсны гомдол гаргахаар бэлтгэж байна.

Нийслэлийн Засаг даргын нэгдүгээр орлогч Т.Даваадалай мэдээлэхдээ, хатаж, бэхжээгүй явган хүний зам дээр мебель ачсан хүнд даацын машины нөлөөгөөр зам эвдэрсэн гэж тодотголоо. Мөн нэгдүгээр хорооллын урд талын явган хүний зам дээр иргэд оройн цагаар тээврийн хэрэгслээ байрлуулж, замыг эвдэх тохиолдол гарч байгаа талаар анхаарууллаа.

ТАСО компани Чех улсад хоёр жилийн туршлага судалсны үндсэн дээр 32-ын тойрогт 8400 ам метр чулуун явган замыг хуурай аргын технологиор, анх удаа Монголд өөрсдөө олборлож бэлтгэсэн чулуугаар стандартын дагуу тавьжээ. Гэвч тавьснаас хойш гурван удаа хүний оролцоотойгоор тус зам эвдэрсэн тохиолдлууд бүртгэгдсэн байна.

Гүйцэтгэгчид иргэдэд явган хүний замыг эвдэхгүй байхыг уриалж, Улаанбаатар хотын гол гудамж, замуудыг байгалийн чулуугаар шинэчлэх ажлыг дэмжихийг хүсчээ.

Эх сурвалж: Үндэсний үйлдвэрлэгч “ТАСО” ХХК, Нийслэлийн Засаг даргын тамгын газар