Улаанбаатар хотын хөгжлийн 24 мега төслийн нэг болох “Дүүжин замын тээвэр” төслийн барилгын ажлыг өнгөрсөн хавар эхлүүлсэн бөгөөд Яармаг–Өнөр хороолол чиглэлийн эхний шугам нь 4.2 км урттай, 6.45–42 метр өндөр 19 тулгуур баганатай байхаар төлөвлөгдсөн. Одоогоор шон суурийн ажил бүрэн дуусч, Францаас нийлүүлсэн тоног төхөөрөмжийн эхний ээлжийн 67 чингэлэг ачаа талбайд буусан бөгөөд метал хийцийн угсралтыг “Пома” группийн инженер Жоан Антониноор ахлуулсан баг гүйцэтгэж байна. Үндсэн тулгуур баганы угсралт ирэх долоо хоногт эхлэх юм.
Мөн төслийн хоёрдугаар шугам нь Үндэсний цэцэрлэгт хүрээлэн–Үндэсний соёл амралтын хүрээлэн чиглэлд 2.7 км урттай, гурван зогсоолтойгоор төлөвлөгджээ. Төсөл хэрэгжсэнээр нийтийн тээврийн хүртээмж, авто замын хөдөлгөөний дундаж хурд дөрвөн хувиар нэмэгдэж, агаарын бохирдлыг бууруулах, хүн амын нягтаршилтай бүсийг холбох, аялал жуулчлалын сонирхлыг нэмэгдүүлэх зэрэг олон талын үр өгөөж үзүүлэхээр тооцоолсон байна.
Энэхүү бүтээн байгуулалт нь Монгол, Францын Засгийн газрын санхүүгийн хэлэлцээрийн хүрээнд хэрэгжиж байгаа бөгөөд нийтийн тээврийн салбарт олон улсын жишигт нийцсэн, байгальд ээлтэй, шинэлэг шийдэл нутагшуулах зорилготой юм.
Эх сурвалж: ЗТЯ
