Цахим хөгжил, инновац, харилцаа холбооны яам болон НЗДТГ-аас байгуулсан ажлын хэсэг нийслэлийн төвийн Энхтайвны өргөн чөлөө, Чингисийн өргөн чөлөө, Их тойруу, Бага тойруу орчмын ил байрласан 22.9 км кабель, сүлжээний утсыг газар доорх өргөтгөлд байрлуулах ажил эхлүүлжээ. “Мэдээлэл холбооны сүлжээ” компанийн мэдээлснээр өргөтгөл нь тус бүр 110 см диаметртэй дөрвөн яндант сувагчлал байх бөгөөд 1996 оны “МОН-1300” төслөөс хойш нийслэлд ийм хэмжээний өргөтгөл хийгдээгүй байна.

Түүнчлэн “Чингисийн мэлмий” компани Төв шуудангийн урд талаас 19 дүгээр хороолол хүртэлх 6,354 м² талбай бүхий явган болон дугуйн замыг шинэчилж байгаа бөгөөд монгол чулуун хавтангийн олдоц багассантай холбоотойгоор хятадын чулуун хавтан ашиглаж эхэлжээ. Мөн асфальтбетон дугуйн зам, ногоон байгууламжийн ажлыг хийж, нийт гүйцэтгэл 20 гаруй хувьд хүрээд байна.

Нийслэлийн Засаг даргын нэгдүгээр орлогч Т.Даваадалай уг ажлыг есдүгээр сарын 1-ний дотор дуусгаж, худаг, сувагчлалын өргөтгөлийн ажилтай уялдуулахыг анхааруулсан байна.

Эх сурвалж: НЗДТГ