Сүүлийн өдрүүдэд олон нийтийн дунд өндөр насны тэтгэвэрт гарсан багш нарын оронд багш авахгүй гэсэн мэдээлэл тархаад байгаа талаар Боловсролын яамны албан эх сурвалж тодруулга өглөө. Тус яамны тайлбарласнаар, уг шийдвэр нь зөвхөн бусад төрийн албан хаагчдад хамаарах бөгөөд ерөнхий боловсролын сургууль, цэцэрлэгийн багш нарт үйлчлэхгүй юм. Өндөр насны тэтгэвэрт гарсан багшийн орон тоог нөхөх эсэхийг тухайн сургуулийн захирал өөрөө шийдвэрлэдэг байна.
Энэ асуудлаар өнөөдөр Боловсролын яамнаас албан мэдэгдэл гаргахаар төлөвлөжээ. Монгол Улсын сайд, Засгийн газрын Хэрэг эрхлэх газрын даргын 2025 оны ХЭГ/1760 дугаар албан бичгээр төрийн байгууллагуудын сул орон тоог нөхөх сонгон шалгаруулалтыг зогсоох, шинээр албан тушаал бий болгохгүй байх, мөн өндөр насны тэтгэвэрт гарсан ажилтны орон тоог түр царцаах чиглэл өгсөн байна.
Энэхүү арга хэмжээ нь төрийн байгууллагын бүтэц, зохион байгуулалт, чиг үүргийг оновчтой болгож, удирдах болон гүйцэтгэх албан тушаалын зохистой харьцааг хангах, давхардлыг арилгах, төсвийн зардлыг хэмнэх бодлого хэрэгжүүлэх хүртэл үргэлжилнэ гэж тусгасан байна.
Эх сурвалж: Боловсролын яам
