Цагдаагийн байгууллага энэ оны зургадугаар сард “Зорчих эрх хязгаарлах” таслан сэргийлэх арга хэмжээ авхуулсан байх үедээ цахим гавыг тасалж, мөрдөн байцаалтын шатнаас оргон зайлсан этгээдүүдийг баривчилсан байна. Мөрдөн шалгах ажиллагааны явцад тэд Сүхбаатар, Чингэлтэй, Баянзүрх, Хан-Уул дүүргийн нутаг дэвсгэрт бүлэглэн хорин удаагийн орон байрны хулгай, хоёр удаа тээврийн хэрэгсэл хулгайлсан нь тогтоогджээ.

Одоогоор мөрдөн шалгах ажиллагаа үргэлжилж байгаа бөгөөд цагдаагийн байгууллагаас иргэдийг орон байраа эзэнгүй удаан хугацаагаар орхихдоо хаалга, цоож, бэхэлгээгээ сайтар хийх, хөршийн холбоогоо бэхжүүлэх, хяналтын камер, дохиоллын систем суурилуулахыг зөвлөж байна. Мөн цахим хуудсандаа гэрээсээ хол байгаа талаарх зураг, бичлэг нийтлэхгүй байх нь эд хөрөнгөө хамгаалах чухал арга хэмжээ болохыг онцоллоо.

Эх сурвалж: Цагдаагийн ерөнхий газар