УИХ-ын хаврын ээлжит чуулганы хуралдаанаар Засгийн газраас 2025 оны гуравдугаар сарын 26-нд өргөн барьсан Зөвшөөрлийн тухай хуульд нэмэлт, өөрчлөлт оруулах тухай болон хамт өргөн мэдүүлсэн бусад хуулийн төслүүдийг баталсан байна. Шинэ зохицуулалтаар Монгол Улсад төлбөрт таавар, бооцоот болон цахим мөрийтэй тоглоомын үйл ажиллагааг бүрэн хориглох шийдвэр гаргав.

Олон нийтийн газар эсвэл мэдээллийн технологи ашиглан ашиг олох зорилгоор ийм төрлийн тоглоом зохион байгуулсан тохиолдолд Эрүүгийн хуулиар гэмт хэрэгт тооцох бөгөөд 2700-14000 нэгжтэй тэнцэх төгрөгөөр торгох, 240-720 цаг хүртэл нийтэд тустай ажил хийлгэх, зургаан сараас гурван жил хүртэл хорих зэрэг ял онооно.

Мөн бусдын нэр дээрх төлбөр тооцооны данс, цахим мөнгө, виртуал хөрөнгө, харилцаа холбооны дугаар, цахим тодорхойлогч ашиглуулсан бол 450-5400 нэгжтэй тэнцэх төгрөгөөр торгох, ижил хугацаагаар нийтэд тустай ажил хийлгэх, зорчих эрхийг хязгаарлах эсвэл хорих ял оноохоор хуульчилжээ. Үүнээс гадна аливаа этгээд ийм төрлийн тоглоомыг сурталчилбал зөрчилд тооцож, хууль бус зар сурталчилгаа хэмээн үзэх бөгөөд холбогдох торгуулийн арга хэмжээ авна. Мөн онцгой албан татвар болон орлогын албан татварын тухай хуульд холбогдох зохицуулалтыг энэ төрлийн үйл ажиллагааг хориглосонтой уялдуулан хүчингүй болгосон байна. Хуулиудыг ердийн журмаар хэрэгжүүлэхээр тогтов.

Эх сурвалж: УИХ-ын Хэвлэл мэдээллийн газар