Сүхбаатар дүүргийн үүсгэн байгуулагдсаны 60 жилийн ой-д зориулан шинэчилсэн “Сүхбаатар дүүрэг 60 жил” сэдэвт шуудангийн маркийг албан ёсоор нээлээ.

Уг түүхэн маркийг Нийслэлийн Сүхбаатар дүүрэг болон Монгол Шуудан ХК хамтран бүтээж, шуудангийн гүйлгээнд гаргаж буй нь онцлог юм.

Түүхэн товчоо

• 1965 оны 4 дүгээр сарын 14-нд БНМАУ-ын Ардын Их Хурлын Тэргүүлэгчдийн 79 дүгээр зарлигаар Улаанбаатар хотыг шинэчлэн зохион байгуулж, хуучин 10 хороог татан буулган Сүхбаатар, Октябрь, Ажилчин, Найрамдал гэсэн 4 районыг байгуулжээ.

• 1992 оны 8 дугаар сарын 18-нд Улсын Их Хурлын 18 дугаар тогтоолоор Сүхбаатарын районыг Сүхбаатар, Чингэлтэй гэсэн хоёр дүүрэг болгон хуваасан байна.

Марк болон түүний онцлог

“Сүхбаатар дүүрэг 60 жил” сэдэвт шинэ марк нь:

• 30х40 мм хэмжээтэй

• Нийт 16,020 ширхэг хэвлэгдсэн

• Анхны өдрийн дугтуй нь 12,000 төгрөгийн үнэтэй

Марк дээр дүрслэгдсэн зураг нь УГЗ, ардын зураач А.Сэнгэцохиогийн “Төрийн тамга хүлээн авах ёслол” бүтээлийн шинэчилсэн хувилбар бөгөөд анх 1973 онд Д.Сүхбаатарын мэндэлсний 80 жилийн ойд зориулан гаргасан таван нэрийн маркийн нэг байсан юм.

“Монгол Шуудан” ХК-ийн байр суурь

“Монгол Шуудан” ХК-ийн гүйцэтгэх захирал Г.Тэлмэн нээлтийн үеэр хэлэхдээ:

“Марк бол зөвхөн шуудангийн төлбөрийн тэмдэгт бус, тухайн цаг үеийн онцлох үйл явдал, түүх, хүмүүс, байгаль, өв соёлыг илтгэгч баримтат өв юм. Манай компани 101 жилийн хугацаанд 1190 сэдвийн 5000 гаруй марк гаргасан. Сүхбаатар дүүргийн ойн босгон дээр гаргаж буй энэхүү марк нь 1191 дэх сэдэв болж байна” гэв.

Монгол маркийн түүхэнд жанжин Д.Сүхбаатарын хөрөг, хөшөө бүхий марк анх 1941 онд “Шинэ Монгол” сэдвээр хэвлэгдэж байсан бөгөөд өнөөг хүртэл 30 орчим марк дээр дүрслэгдсэн байна.

Эх сурвалж: Монгол Шуудан ХК, Сүхбаатар дүүргийн ЗДТГ