2025 оны 8-р сард Улаанбаатар хотын хэмжээнд бүх 204 хороонд зэрэг тохижилтын ажлууд хийгдэж байна. Нийслэлийн Засаг даргын захирамжаар хэрэгжиж буй уг санаачилгын хүрээнд хороод тус бүрт 50 сая төгрөгийн хөрөнгө оруулалт хийж, орон нутгийн бие даасан шийдвэр, хэрэгжилтийг дэмжиж буй нь онцлог юм. Төвийн зургаа болон алслагдсан гурван дүүрэгт хамаарах эдгээр хороодод иргэдийн эрүүл, аюулгүй амьдрах орчныг бүрдүүлэх зорилгоор хүүхдийн тоглоомын талбай, явган зам, хашаа хайс зэрэг тохижилтын ажил өрнөж байна.

Тухайлбал, Багануур дүүргийн 1 дүгээр хороонд тохижилтын ажил 90 хувийн гүйцэтгэлтэй байгаа бөгөөд дүүргийн Ерөнхий менежерээр ахлуулсан ажлын хэсэг дараах ажлуудыг хийж байна:

• Явган хүний замын тохижилт, засвар

• Авто зогсоолын өргөтгөл

• Авто замын дундах гэрэлтүүлгийн шонг шилжүүлэх

• Сургууль, цэцэрлэгийн ойролцоо хурд сааруулагч байршуулах

• Харанхуй хэсгүүдэд нэмэлт гэрэлтүүлэг суурилуулах

Мөн “Иргэдээ сонсох” аяны хүрээнд иргэдийн санал хүсэлтийг үндэслэн “Титэм” хотхоны зүүн хойд талаас хөл бөмбөгийн талбай хүртэл явган хүний зам дагуу хоёр гэрэлтүүлгийн шон шинээр суурилуулжээ. Үүнээс гадна орон сууцны хороололд байрлах 10 гэрэлтүүлгийн шонг зөөвөрлөн шилжүүлсэн байна.

Хотын хэмжээнд хэрэгжиж буй энэхүү санаачилгын уялдааг хангах, бүх шатанд хариуцлагатай байдлыг төлөвшүүлэх үүднээс Нийслэлийн Засаг дарга Х.Нямбаатар хороод, дүүргүүдийн удирдлагуудтай улирал тутам уулзалт хийж, тулгамдсан асуудлыг хэлэлцэн шийдвэрлэж байгаа юм.

Эх сурвалж: Нийслэлийн ЗДТГ