Энэ жил Сэлэнгэ аймгийн Онцгой байдлын газрын алба хаагчид тэмдэглэлт өдөр болон Улсын их баяр наадмаа умартан, хэдэн сарын турш түймрийн голомтод үүрэг гүйцэтгэсэн онцгой жил болж өнгөрөв. Жил бүрийн зургаадугаар сарын 20-ныг Онцгой байдлын ажилчдын өдөр болгон тэмдэглэдэг ч өнгөрсөн дөрөвдүгээр сарын 20-ноос хойш үргэлжилсэн ой, хээрийн түймрийн улмаас алба хаагчид баярлах завгүй ажиллаж, хэдхэн хоногийн өмнө түймэр бүрэн унтарсны дараа анги салбартаа эргэн иржээ.

Өнөөдөр Сэлэнгэ аймгийн ОБГ-ын удирдлагын зүгээс Онцгой байдлын баяраа нөхөн тэмдэглэж, Монгол Улсын Шадар сайд, ОБЕГ-ын дарга, аймаг, сум, орон нутаг болон байгууллагын шагналаар алба хаагчдаа шагнаж, тэдний гавьяаг алдаршууллаа.

Шагналын өдөр Сэлэнгэ аймгийн Засаг дарга, аймгийн Онцгой комиссын дарга Н.Лхагвадорж баатарлаг залууст баяр хүргэж, эх орон, ард иргэд, аж ахуйн нэгжийн эд хөрөнгө, амь насыг авран хамгаалахын төлөө өөрийн биеэ үл хайрласан зүтгэлд нь гүн талархал илэрхийлэв.

Эх сурвалж: Сэлэнгэ аймгийн ОБГ.