ЮНЕСКО-гийн “Соёлын биет бус өвийг хамгаалах тухай” 2003 оны конвенц, Соёлын өвийг хамгаалах тухай хуулийн 39 дүгээр зүйлийн 39.2 дахь заалт, Монгол Улсын Засгийн газрын 2024 оны 1 дүгээр сарын 25-ны өдрийн 41 дүгээр тогтоолын хүрээнд жил бүр уламжлал болгон зохион байгуулдаг “Нүүдэлчин” дэлхийн соёлын фестиваль энэ онд 8 дугаар сарын 22-24-нд Налайх дүүргийн Тайж хайрхан уулын бэлд болно.

Энэ жилийн наадам нь Монгол Улсын соёлын биет бус өвийн олон төрөл зүйл, угсаатны бүлгийн онцлогийг таниулан сурталчлах зорилготой бөгөөд бүсчилсэн хөгжлийн үзэл баримтлалын дагуу отог хэлбэрээр зохион байгуулагдана. Үзэгчид 780 хөтөлбөрт арга хэмжээ, үндэсний спортын 10 төрлөөр болох уралдаан, тэмцээнийг үзэхийн зэрэгцээ уламжлалт өв соёлтой танилцах, оролцож суралцах, мэдлэг, ур чадвар олж авах боломжтой.

Фестивалийн үеэр болох “Морьт харваа”-ны 17 дахь удаагийн Дэлхийн аварга шалгаруулах тэмцээнд 30 гаруй улсын 120 гаруй шилдэг харваач, Монгол Улсын 15 шилдэг харваач, олон улсын зэрэглэлтэй шүүгчид, мөн ЮНЕСКО болон Дэлхийн морьт харвааны холбооны удирдлагууд оролцоно.