Монгол Улсын Зэвсэгт хүчнээс хүүхэд багачуудад үндэсний бахархал, түүх, өв соёл, уламжлалт ёс заншил, эх оронч үзлийг төлөвшүүлэх зорилгоор хэрэгжүүлж буй “Байгальд амьдрах арга ухаан-2025” төсөл амжилттай үргэлжилж байна. Энэ төсөл нь зусланд амарч буй хүүхдүүдийг зөв, аюулгүй амьдрах мэдлэг, чадварт сургахаас гадна монгол ахуй, хэл соёл, гэр бүлийн хүмүүжил, монгол гэр барих ёс заншлыг таниулах сургалтуудыг багтаажээ.

Одоогоор Улаанбаатар хотын Олон Улсын “Найрамдал”, “Сансар”, “Нарс”, “English Camp”, “Dream Camp”, “Galaxy”, Баянзүрх дүүргийн “Хөдөлмөр”, “Янзага”, “Өнөр бүл” хүүхдийн төв зэрэг газраас 5800 гаруй хүүхэд уг хөтөлбөрт хамрагдаад байна.

“Сансар” олон улсын зуслангийн 8 дугаар ээлжид хэрэгжүүлж буй “Эх оронч хүүхдүүд” хөтөлбөрөөр сурагчид анхан шатны эмнэлгийн тусламж үзүүлэх, говь, цөл, уул, ой, ширэнгэн ой, гол мөрөн, цаг агаарын эрс тэс нөхцөлд хэрхэн амьд гарах талаар суралцаж байна. Мөн Монгол эр хүний ёс жудаг, эмэгтэй хүний эрхэмлэх зүйл, гэр бүлийн үнэ цэнэ, өв соёл, эх оронч үзэл, эр зоригийн талаар мэдлэг олж, улс орныхоо хөгжилд хувь хүний оролцоо ямар чухал болохыг ойлгон эх орноороо бахархах сэтгэлээ бэхжүүлж байна.

Сургалтын төгсгөлд хүүхдүүдийн сурсан мэдлэг, дадлага, ур чадварыг “Амьд үлдэх 30 минут” нэртэй буухиа тэмцээнээр шалгах бөгөөд энэ нь цэрэгжилтын тэмцээний агуулгатай ижил, хүүхдэд зориулсан цогц хэлбэрээр явагдана.

Төслийн хүрээнд цэргийн алба хаагчдын гэр бүл, тэдний хүүхдүүдийг 100 хувь үнэ төлбөргүй хамруулах эрхийн бичгээр урамшуулсан нь офицер, ахлагчдын үр хүүхдийн хүмүүжил, хөгжлийн орчинд эерэгээр нөлөөлсөн онцгой арга хэмжээ болсон байна.

Эх сурвалж: Монгол Улсын Зэвсэгт хүчний ерөнхий штаб