Боловсролын Ерөнхий Газраас жил бүрийн долоодугаар сард багшийн сул орон тоог БДБ-19 маягтаар нэгтгэн гаргадаг уламжлалын дагуу, 2024-2025 оны хичээлийн жилд ерөнхий боловсролын сургуульд нийт 3324 багшийн сул орон тоо бүртгэгдээд байна. Үүнээс 1590 нь зөвхөн нийслэлд үүссэн байгаа бол цэцэрлэгийн салбарт нийт 1147 орон тоо, үүний 685 нь нийслэлд, 202 нь бүлгийн багшийн орон тоо байгаа юм.

Харин энэ жил багш мэргэжлээр бакалаврын зэрэгтэй 2877 төгсөгч, мөн багшлах эрхийн сургалтанд хамрагдсан 163 хүн хөдөлмөрийн зах зээлд орж ирж байна. Сул орон тооны тоо төгсөгчдийн тооноос илүү гарч буй нь боловсролын салбарт багшийн нөөцийн архаг дутагдал үүссэнийг харуулж байна.

Сул орон тоо хамгийн өндөртэй мэргэжлүүд:

• Бага ангийн багш: 735

• Сургуулийн өмнөх боловсрол: 426

• Монгол хэл, уран зохиол: 192

• Математик: 135

• Гадаад хэл: 143

Сул орон тоог нөхөх зорилгоор дараах арга хэмжээг авч хэрэгжүүлнэ:

• Шинэ төгсөгчдөд ажлын байрны мэдээллийг нээлттэй хүргэх

• Орон нутагт ажиллах нөхцөлийг сайжруулах

• Багшлах эрхийн сургалтаар шинэ боловсон хүчнийг бэлтгэх

• Салбараа орхисон багш мэргэжилтэй иргэдийг гэрээт болон цагийн багшаар ажиллуулах

• III, IV курсийн оюутнуудыг цалинтай дадлагаар ажиллуулах

• Тэтгэвэрт гарсан багш нарыг хүсэлтийнх нь дагуу түр ажиллуулах

• Сургуулийн удирдах ажилтныг мэргэжлийн чиглэлээр хичээл заалгах

Эдгээр арга хэмжээг шат дараатай хэрэгжүүлснээр боловсролын байгууллагын хүний нөөцийн хомсдлыг бууруулж, сургалтын чанарыг тогтвортой хадгалах зорилготой гэж Боловсролын Ерөнхий Газраас мэдээллээ.

Эх сурвалж: Боловсролын Ерөнхий Газар