Гэр бүл, хөдөлмөр, нийгмийн хамгааллын сайд Т.Аубакир, ТНБД Л.Мөнхзул нар Хүүхэд, гэр бүлийн хөгжлийн бодлогын хэрэгжилтийг хариуцдаг ХГБХХЕГ-т ажиллаж, салбарын нөхцөл байдал, цаашдын зорилтуудын талаар мэдээлэл сонслоо. Уулзалтын үеэр Засгийн газрын бодлого хэрхэн хэрэгжиж буй болон хяналт үнэлгээний талаар хэрэгжүүлэгч агентлаг тайлангаа танилцуулсан юм.

ХГБХХЕГ-ын дарга Б.Баярсайхан ярихдаа, "Хүний хөгжлийн суурь болох хүүхэд, гэр бүлийн хөгжлийн бодлогыг зөвхөн хамгааллын биш, хөгжлийн чиглэлд онцгойлон авч үзэх шаардлагатай. Соён гэгээрэл, дэмжлэг бүхий орчин бүрдсэн цагт залуусын төлөвшил, гэр бүлийн тогтвортой байдал нэмэгдэж, хүчирхийллийн суурь шалтгаанууд буурах болно" хэмээн онцоллоо.

Салбарын ажилтнуудын зүгээс сүүлийн үед хийгдэж буй орон тооны цомхотгол нь тус салбарт ч мөн адил хэрэгжихээр байгааг онцлон анхааруулж, энэ нь аль хэдийн ачаалал өндөртэй ажиллаж буй ажилтнуудад дарамт үүсгэж байгааг илэрхийлжээ. Тухайлбал, ХГБХХЕГ-ын харьяа 108 тусгай дугаар тасралтгүй дуудлагатай, өндөр ачаалалтай ажилладаг ч хүний нөөц хангалтгүй байгааг хэлэв.

ГБХНХ-ийн сайд Т.Аубакир уулзалтын үеэр хүүхэд, гэр бүлийн салбарын орон тоог цомхотгохгүй байх, автомашины хангалтыг сайжруулах, шаардлагатай засвар тоног төхөөрөмжийн хүртээмжийг нэмэгдүүлэхэд анхаарч ажиллахаа илэрхийллээ.

Эх сурвалж: ГБХНХЯ.