Авлигатай тэмцэх газрын Урьдчилан сэргийлэх, соён гэгээрүүлэх хэлтсээс 2025 оны долоодугаар сарын 28-наас наймдугаар сарын 1-ний өдрүүдэд Жижиг, дунд үйлдвэрийн газар, Хөдөө аж ахуйн бирж зэрэг байгууллагын төрөөс үзүүлдэг үйлчилгээнд тандалт хийлээ. Энэхүү тандалтын зорилго нь авлига, ашиг сонирхлын зөрчил, авлигын гэмт хэргээс урьдчилан сэргийлэх, мөн төрийн үйлчилгээний явцад иргэн, аж ахуйн нэгжид чирэгдэл, хүнд суртал учруулж буй нөхцөл байдлыг илрүүлэн үнэлэх, цаашдын арга хэмжээг тодорхойлох явдал байв.

Тандалтын хүрээнд дээрх байгууллагуудын ажлын зохион байгуулалт, ил тод байдал, хариуцлагын тогтолцоо, төрийн албан хаагчийн харилцааны соёл зэрэг олон үзүүлэлтээр дүгнэлт хийсэн байна. Үйл ажиллагааны явцад авлига үүсч болзошгүй орчныг бий болгож байгаа эсэхийг нарийвчлан судалсан бөгөөд шаардлагатай тохиолдолд тухайн байгууллагын дотоод журам, шийдвэр, дүрмийг хянаж, өөрчлөх санал боловсруулан хүргүүлэх чиглэлээр ажиллаж байна. Тухайлбал, “Дээд боловсролын сургалтын байгууллагын суралцагчид тэтгэлэг, зээл, буцалтгүй тусламж олгох, дэмжлэг үзүүлэх, зээл эргэн төлүүлэх журам”-д хяналт хийжээ.

Мөн тус хугацаанд иргэн, хуулийн этгээдээс ирүүлсэн төрийн албан хаагчийн ёс зүй, хүнд сурталтай холбоотой таван гомдол, мэдээллийг хүлээн авч хянан шалгасан байна. Энэ нь төрийн байгууллагын иргэдэд үзүүлж буй үйлчилгээнд итгэл, шударга байдлыг нэмэгдүүлэх, авлигыг бууруулахад чиглэсэн бодитой алхам болж байна.

Эх сурвалж: Авлигатай тэмцэх газар