Нийслэлийн төв хэсэг, Сүхбаатар дүүргийн дүүргийн 9-р хороонд баригдаж буй "Ногоон нуур" хотхоны барилгын оройд тавигдсан China Aid буюу 中国援助 тэмдэглэгээ саяхнаас иргэдийн анхаарлыг татаж эхэлжээ. Уг тэмдэглэгээ нь Хятадын Засгийн газрын буцалтгүй тусламжаар баригдсан эмнэлэг, сургууль, барилга байгууламжууд дээр хийгддэг аж.
БНХАУ-ын Засгийн газрын 350 сая юанийн буцалтгүй тусламжаар Улаанбаатар хотын төвд баригдаж буй “Ногоон нуур 1008 айлын орон сууц” төслийн нээлтийг 2022 оны зургадугаар сарын 26-д хийж, нээлтийн ажиллагаанд БХБЯам, ТОСК-ийн удирдлагууд, Элчин сайд Цай Вэньруй болон төслийн гүйцэтгэгч “Хятадын хоёр дахь металлурги групп корпораци” ХХК-ийн Монгол дахь төлөөлөгчийн газрынхан оролцжээ.
Ногоон нуур орчмын 4,2 га талбайд 21 давхар 8 блок бүхий нийт 84.833 м2 талбайтай, 7519 м2 ил болон газар доорхи нэгдсэн автомашины зогсоолтой, иж бүрэн инженерийн дэд бүтэц, шугам сүлжээтэй, 2420 м2 явган хүний талбай, 1262 м2 хүүхдийн тоглоомын талбай, 7270 м2 ногоон байгууламжийн талбайтай, цутгамал төмөр бетон хийцтэй, давхартаа 49.95, 55.04 мкв хоёр өрөө бүхий 6 айлтай ниит 1008 айлын цогцолбор хороолл ын ажил өнөөдрийн байдлаар 85 хувьтай яваа бөгөөд ирэх зургадугаар сарын 15-наас эхний блокуудаа үе шаттайгаар ашиглалтад оруулна. Гадна тохижилтын ажил хийгдэж дууссаны дараа буюу энэ оны долдугаар сард багтаан захиалагчид хүлээлгэж өгөхөөр төлөвлөж байгаа аж.
Хөрсний ус ихтэй, намгархаг учир барилга барих боломжгүйд тооцогддог байсан тухайн байршилд барилгын ажлыг эхлүүлэхийн төслийн гүйцэтгэгч нар 19 цооног өрөмдөж, хөрсний усыг шавхсан байна. Ингэснээр, манайд түгээмэл тохиолддог байруудын зоорины давхар үер, усанд автах зэрэг асуудлыг бүрэн шийджээ.
Хорооллын доторх авто зам, ил далд авто зогсоол, ногоон байгууламж, гадна төвлөрсөн инженерийн шугам сүлжээ бүхий цогцолбор хороолол дотор 960 хүүхдийн багтаамжтай сургууль, 240 хүүхдийн цэцэрлэг баригдах юм. Төслийн гүйцэтгэгчээр БНХАУ-ын “Хятадын хоёр дахь Металлурги групп корпораци” ХХК, ТЭЗҮ, зураг төслийн гүйцэтгэгчээр “Интеллект тауэр” ХХК, Захиалагчийн хяналт хэрэгжүүлэгчээр “Ногоон нуур 1008 айлын төсөл хэрэгжүүлэх нэгж” тус тус ажиллаж байна.
