Гадаад харилцааны яамнаас БНСУ-д зорчиж буй монгол иргэдийн эрх ашгийг хамгаалах, визийн нөхцөлийг сайжруулах чиглэлээр Солонгосын талд хэд хэдэн асуудлыг албан ёсоор тавьж, тодорхой шийдвэрүүдийг гаргуулахаар ажиллаж байгаа талаар мэдээлэл гарлаа.

Тавигдаж буй гол шаардлагууд дараах байдалтай байна:

• Виз татгалзсан тохиолдолд дахин мэдүүлэх хязгаарлалтыг цуцлах: Одоогийн байдлаар визний татгалзсан хариу авсан иргэд 6 сарын хугацаанд дахин мэдүүлэх боломжгүй байгаа нь иргэдийн эрхийг хязгаарлаж байна гэж үзэж, уг заалтыг цуцлах санал гаргасан.

• Паспортын түр буцаан авах боломж бүрдүүлэх: Визний хариу гарах хүртэл иргэд гадаад паспортоо буцаан авч чадахгүй байгаа нь олон улсад зорчих, гадаад харилцаанд оролцох боломжийг хааж байна. Иймд нотариатаар баталгаажуулсан хуулбар эсвэл E-Mongolia-аас гаргасан лавлагаагаар орлуулан материалыг бүрдүүлэх боломжийг нээх санал тавьжээ.

• Цахим виз олголт нэвтрүүлэх: Виз мэдүүлгийн үйл явцыг цахим хэлбэрт шилжүүлж, иргэдэд онлайнаар виз олгох зохицуулалт хийж өгөхийг хүссэн байна.

• Эмчилгээний зорилгоор зорчих иргэдийг визийн шаардлагаас чөлөөлөх: Богино хугацаанд буюу 30 хүртэл хоног БНСУ-д зорчих шаардлагатай байгаа өвчтөн, асран хамгаалагчдад визгүй зорчих боломжийг нээх, мөн нэр бүхий аж ахуйн нэгжүүдийн удирдлагад олон удаагийн виз олгох хамрах хүрээг тэлэх саналыг хүргүүлжээ.

• Хил дээрх харьцааг сайжруулах: Хэдийгээр хүчинтэй визтэй байлаа ч, БНСУ-ын хилийн алба монгол иргэдийг үндэслэлгүйгээр саатуулж, гар утас зэрэг эд зүйлсийг хураан авч, хувийн мэдээлэлд халдаж, улмаар албадан буцааж байгаа явдлыг зогсоохыг шаардаж байна.

Нэмэлт арга хэмжээ:

БНСУ-ын хил дээр хүчинтэй визтэй иргэдийг буцаах, үндэслэлгүй саатуулах асуудлыг таслан зогсоох зорилгоор Инчеоны олон улсын нисэх буудалд Монгол Улсаас суугаа ЭСЯ-ны нэг дипломат ажилтныг байнгын үндсэн дээр ажиллуулж эхэлсэн байна.

Эдгээр саналуудыг Гадаад харилцааны яам Солонгосын талтай яриа хэлэлцээрийн хүрээнд уламжилж, Монгол иргэдийн эрх ашгийг хамгаалах, чөлөөтэй зорчих нөхцөлийг бүрдүүлэхэд анхаарч ажиллаж байгааг мэдэгдсэн юм.

Эх сурвалж: Гадаад харилцааны яам.