Монгол Улсад автотээврийн болон өөрөө явагч хэрэгслийн албан татварыг жилд нэг удаа, зургаадугаар сарын 1-ний өдрөөс өмнө харьяалах татварын албанд төлөх хуультай. Энэ үүргийг биелүүлээгүй тохиолдолд замын хөдөлгөөнд оролцох эрхийг хязгаарлах хүртэл арга хэмжээ авдаг. Тээврийн хэрэгслийн татварын тухай хуулийн хэрэгжилт, одоогийн байдал болон иргэд хэрхэн татвараа төлөх талаар Нийслэлийн Татварын газрын татварын улсын байцаагч Д.Батням мэдээлэл өглөө.

2025 онд шинэчилсэн татварын зохицуулалт хэрэгжиж эхэлсэн бөгөөд өнөөдрийн байдлаар нийслэлийн хэмжээнд бүртгэлтэй 718,000 тээврийн хэрэгслээс 228,710 нь татвараа төлөөд байгаа нь төлөлтийн биелэлт 40 гаруй хувьтай байгааг илтгэж байна. Харин 100,000 гаруй иргэн одоогоор татвараа төлөөгүй байгаа аж.

Татвараа хэрхэн төлөх вэ?
Иргэд дараах цахим болон уламжлалт сувгаар татвараа төлөх боломжтой:

• Цахимаар:

  • И-Монголиа

  • Gereg kiosk

  • smartcar.mn

  • autobox.mn

  • etax, Ebarimt

  • Арилжааны банкуудын аппликэйшн

• Банкны салбарууд:
  Шууд очиж биечлэн төлбөр хийх боломжтой.

Хуулийн хугацаа дуусахад ойртоод байна
Хувь хүн зургаадугаар сарын 1-ний өдрөөс өмнө татвараа төлөх үүрэгтэй бол, аж ахуйн нэгж байгууллагууд улирал бүрийн сүүлчийн сарын 25-ны дотор тэнцүү хэмжээгээр хуваан төлөх ёстой. Автотээврийн хэрэгслээ бусдад шилжүүлсэн тохиолдолд дараагийн улирлаас эхлэн татварын үүрэг дуусгавар болдог.

Төлөөгүй бол ямар хариуцлага хүлээх вэ?
Хугацаандаа төлөөгүй тохиолдолд Замын хөдөлгөөний аюулгүй байдлын тухай хуульд заасны дагуу тухайн тээврийн хэрэгслийг хөдөлгөөнд оролцуулахыг хориглох бөгөөд эрх нь хязгаарлагдах эрсдэл үүснэ. Мөн тухайн оны зургаадугаар сарын 1-нээс хойш импортоор орж ирсэн тээврийн хэрэгслийн татварыг тухайн жилдээ үлдсэн хугацааны хэмжээнд тооцон төлнө.

Иргэдийн анхаарах ёстой гол зүйл бол хугацаандаа татвараа төлж, замын хөдөлгөөнд оролцох эрхээ баталгаажуулах явдал юм.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс