Энэ сарын 16-18-ны өдрүүдэд “Илүү их уншья” уриатай 37 дахь удаагийн “Номын баяр”-ыг жанжин Д.Сүхбаатарын талбайд, Монгол Улсын Ерөнхийлөгчийн ивээл дор өргөн хүрээнд зохион байгуулах гэж байна.
Нийтээр тэмдэглэх баярын болон тэмдэглэлт өдрүүдийн тухай хуулийн дагуу тав болон есдүгээр сарын гурав дахь долоо хоногийн бямба, ням гаргуудад Үндэсний бичиг соёл, номын өдрүүд-ийг тэмдэглэдэг бөгөөд уг баяр нь ном унших соёл, хандлагыг төлөвшүүлэх, уншлагыг дэмжих, бүтээлч туурвигчдыг алдаршуулах зорилготой юм.
Баярын хүрээнд:
-
Монголын болон дэлхийн шилдэг ном, бүтээлийн худалдаа
-
Шинэ номын нээлт, зохиолч-уншигчийн уулзалт
-
Гадаад, дотоодын хэвлэлийн газар, номын маркетинг, борлуулалтын уулзалт
-
“Байгаль экологийн 50 ном”-ын танилцуулга
-
Хүүхдэд зориулсан хөтөлбөрүүд зэрэг олон талт арга хэмжээ болох юм.
Мөн уур амьсгалын өөрчлөлт, цөлжилт, байгаль орчны доройтол зэрэг дэлхий нийтийн тулгамдсан асуудалд анхаарал хандуулж, Ерөнхийлөгчийн Тамгын газар энэ удаагийн баярт “Үндэсний бахархалт амьтан мазаалай” сэдвээр оролцохоор төлөвлөжээ. Алтайн өвөр говьд 50 орчим тоо толгой үлдээд буй мазаалайг хамгаалах, олон нийтэд мэдлэг мэдээлэл түгээх зорилготой уг оролцооны хүрээнд мөн “Тэрбум мод”, “Хүнсний хангамж, аюулгүй байдал”, “Эрүүл монгол хүн”, “Цагаан алт” зэрэг үндэсний хөтөлбөрүүдийн талаарх мэдээллийг түгээнэ.
Баярын үеэр:
-
НЗДТГ-аас “Номын грант” нэртэй 3 сая төгрөгийн тэтгэлэг олгоно. Шагнал нь хүүхэд, залуусын уншлагыг дэмжсэн бүтээл, хотын хөгжлийг зорилсон зохиолуудыг үнэлэхэд чиглэж байна.
-
“Номын сайн нөхөр” уралдааны хүрээнд “Шилдэг ном”, “Шилдэг уншигч”, “Шилдэг хэвлэлийн газар”, “Шилдэг номын сан”, “Д.Нацагдорж тэмдэгтэн хүүхдүүд” зэрэг олон номинацид шалгаруулалт хийнэ.
-
Хүүхдүүдийн дунд номын тэмдэглэл хөтлөх, зурагт хуудас болон подкаст бэлтгэх, уншлагын аянд оролцох зэрэг уралдаан зарлаж, шалгарсан оролцогчдыг шагнах юм.
Жил бүрийн “Номын баяр” уншигчдын тоо, оролцогчдын цар хүрээгээрээ тэлж ирсэн бөгөөд дунджаар 300,000 гаруй уншигч, 200 гаруй хэвлэн нийтлэгч, 300 орчим зохиолч, орчуулагч, редактор, зураач, эрдэмтэн судлаач тогтмол оролцдог байна. Энэ удаад ОХУ, БНХАУ, БНСУ-аас зохиолчид, хэвлэн нийтлэгчид хүрэлцэн ирнэ.
“Номын баяр”-ыг “Номын соёлт ертөнц” ТББ санаачлан, Ерөнхийлөгчийн Тамгын газар, Байгаль орчин, уур амьсгалын өөрчлөлтийн яам, Соёл, спорт, аялал жуулчлал, залуучуудын яам, НЗДТГ, Нийслэлийн Соёл, урлагийн газар хамтран зохион байгуулна.
Эх сурвалж: Монгол Улсын Ерөнхийлөгчийн Тамгын газрын Хэвлэл мэдээллийн алба
