Эрүүл мэндийн яамны хүсэлтээр ДЭМБ Монгол Улсад электрон тамхины зах зээл, хэрэглээ, ялангуяа маркетингийн нөлөө хүүхэд, залуусын хэрэглээнд хэрхэн нөлөөлж буйг судлах ажлыг захиалж, Сингапурын судлаачид гүйцэтгэлээ. Судалгааны урьдчилсан үр дүнг өнөөдөр Эрүүл мэндийн сайд Т.Мөнхсайханд танилцуулсан байна.
Судалгаанд Улаанбаатар хотын төвийн болон захын бүсүүдийн ерөнхий боловсролын сургуулиуд, кино театр, худалдааны төв, парк зэрэг хүүхэд, залуус чөлөөт цагаа өнгөрөөдөг газруудыг хамруулсан байна. Судалгааг ДЭМБ-ын сургуульд суурилсан аргачлал болон холимог судалгааны аргаар гүйцэтгэсэн юм.
Судалгаанд оролцсон ихэнх сурагч электрон тамхийг ядаж нэг удаа хэрэглэж үзсэн, эсвэл тогтмол хэрэглэдэг гэжээ. Тэдний олонх нь электрон тамхийг гэрийн орчим дахь хүнсний дэлгүүрээс амархан худалдан авдаг, хэрэглээ нь “загварлаг”, “күүл харагддаг”, олны танил хүмүүсийн хэрэглэж буй дүр төрхийг дуурайдаг хандлага байгааг илэрхийлсэн байна.
Сонирхол татах өөр нэг үр дүн нь зах зээл дээрх электрон тамхины нэр төрөл 2025 оны байдлаар 756-д хүрсэн нь 2020 онтой харьцуулахад огцом өссөн үзүүлэлт юм.
Энэхүү судалгааны эцсийн тайлан тун удахгүй бүрэн хэлбэрээр бэлэн болох бөгөөд түүний үндсэн дээр бодлого боловсруулагчдад зориулсан зөвлөмж, интервенциудыг танилцуулах юм.
Эх сурвалж: Эрүүл мэндийн яам
