Нийслэлийн гамшгаас хамгаалах зөвлөлөөс санаачлан, Нийслэлийн онцгой байдлын газар, Гэрлэх ёслолын ордонтой хамтран онцгой байдлын албанд ажиллаж буй 15 алба хаагчийн хуримын ёслолыг ёслол төгөлдөр зохион байгууллаа. Энэхүү арга хэмжээ нь гэр бүлийн олон улсын өдрийг угтан явагдаж байгаагаараа онцлог юм.

Ёслолд Онцгой байдлын ерөнхий газрын харъяа 09, 111, 113, 119, 123, 185 дугаар анги болон нийслэлийн Онцгой байдлын газрын Баянзүрх, Багануур, Сүхбаатар, Хан-Уул дүүргийн Онцгой байдлын хэлтсүүдийн төлөөлөл болсон алба хаагчид оролцсон байна. Тэд тусгай үүрэгтэй, өндөр хариуцлага хүлээсэн онцгой ажлынхаа хажуугаар аз жаргалтай мөчөө хамтдаа хуваалцлаа.

Гэрлэх ёслолын ордны захирал Ү.Оюунзул “Онцгой байдлын алба хаагчид бол эх орон, ард түмнийхээ төлөө амьдралаа зориулсан хүмүүс. Иймээс тэдний гэр бүлийн амьдралын хамгийн нандин мөчийг төрийн ордонтой адил нэр хүндтэй энэ танхимд тэмдэглэж буй нь бидний талархал, хүндэтгэлийг илэрхийлж буй хэрэг юм” хэмээн онцолсон юм.

Ёслолд оролцсон 113 дугаар ангид ахлах тогоочоор ажилладаг Б.Мөнгөнчимэг сэтгэгдлээ хуваалцахдаа “Бид хоёр 19 жил хамт амьдарсан. Хуримын ордонд даашинз өмсөж орох бол миний олон жилийн мөрөөдөл байсан. Байгууллагаас минь дэмжсэнд маш их баярлаж байна. Энэ бол үнэхээр сэтгэл хөдөлгөм мөч” хэмээн нулимстай хэлжээ.

Гэр бүлийн олон улсын өдөр маргааш буюу тавдугаар сарын 16-нд тохионо.

Эх сурвалж: НОБГ, Гэрлэх ёслолын ордон, Онцгой байдлын ерөнхий газар