2025 оны тавдугаар сарын 15-ны Пүрэв гарагт Улаанбаатар хот болон орон нутагт дараах үйл явдлууд болох хуваарьтай байна. Зарим арга хэмжээ нийтийн хүртээлтэй байгааг анхаарна уу.

Өглөөний 09:00 цагт онц чухал мэдээллийн дэд бүтэцтэй байгууллагуудад зориулсан кибер аюулгүй байдлын сургалт МҮХАҮТ-д эхэлнэ. Энэхүү сургалт нь төр, хувийн хэвшлийн мэдээллийн аюулгүй байдлын мэргэжилтнүүдэд нэн чухал ач холбогдолтой. Холбоо барих утас: 88813754.

11:00 цагт Д.Сүхбаатарын талбайд “Ажилтай өрх — Аз жаргалтай гэр бүл” сэдэвт өдөрлөг зохион байгуулагдах бөгөөд ажил эрхлэлт, нийгмийн халамжийн талаар иргэдэд зөвлөгөө мэдээлэл өгөх юм.

11:30 цагт Монгол Улсын Ерөнхийлөгч У.Хүрэлсүх зэвсэгт хүчний алба хаагчдад цэргийн одон медаль гардуулна.

Мөн өнөө орой “BEST OF KHUSUGTUN” пянзны нээлтийн тоглолт Улсын дуурь бүжгийн эрдмийн театрын тайзнаа тоглогдох юм. Хөгжим сонирхогчдын хувьд онцлох арга хэмжээ болж байна.

Түүнчлэн “Амьд ертөнцийн спектр” сэдэвт биологийн тусгай үзэсгэлэн Чингис хаан Үндэсний музейд үргэлжилж байгаа бөгөөд энэ нь зургадугаар сарын 1-нийг дуустал нээлттэй байх юм.

Мод үржүүлэг, ойжуулалтын салбарт ажиллагсдын хувьд онцлог үйл ажиллагаа болж буй “Модлог гарден экспо” үзэсгэлэн худалдаа “IC Park”-т үргэлжилж байна. Энэ үзэсгэлэн 60 хоногийн турш зохион байгуулагдах ба байгаль орчныг хамгаалах, ногоон байгууламжийг нэмэгдүүлэх зорилготой.

Орон нутагт:
Сэлэнгэ аймгийн Сүхбаатар суманд бүх нийтийн мод тарих ажил явагдана. Мөн тус аймгийн Нийтийн номын сан Үндэсний бичиг, соёл номын өдрүүдийг угтан бүх насны иргэдийн дунд “Мийм бүтээх” цахим уралдааныг энэ сарын 20-ныг хүртэл зохион байгуулж байна.

Хилийн чанадад:
АНЭУ-ын Аль-Айн хотод болж буй шатрын насанд хүрэгчдийн Ази тивийн аварга шалгаруулах тэмцээнд Монголын шатарчид оролцож байна. Уг тэмцээн тавдугаар сарын 6-16-нд үргэлжлэх юм.

Мөн Чехийн Үндэсний музейд “Чингис хаан” олон улсын үзэсгэлэн тавдугаар сарын турш үргэлжилж, зургадугаар сарын 22-ныг хүртэл олон нийтэд нээлттэй байна.