Хүүхдийг ивээх сан болон Япон Улсын Гадаад хэргийн яамны санхүүжилтээр хэрэгжүүлж буй “Тэгш хүртээмжтэй, цогц үйлчилгээгээр бага насны хүүхдийн хөгжлийг дэмжих нь” төслийн хоёрдугаар үе шат Баянхонгор аймагт албан ёсоор эхэллээ. Төслийн хүрээнд орон нутгийн төрийн өмчийн байгууллагуудын чадавхыг бэхжүүлж, бага насны хүүхдийн хөгжлийг эрт илрүүлэн дэмжих зорилготой үйл ажиллагаанууд хэрэгжих юм.
Өнгөрсөн оны дөрөвдүгээр сараас хэрэгжиж эхэлсэн эхний үе шатанд Баянхонгор сумын 16 дугаар цэцэрлэг болон Энхбүрд өрхийн эрүүл мэндийн төв хамрагдсан бол энэ удаад Баян-Ойт цогцолбор сургууль болон Оточ мандал өрхийн эрүүл мэндийн төв загвар байгууллагаар сонгогдон ажиллана.
Төслийн хоёрдугаар үе шат эхэлсэнтэй холбогдуулан хамтын ажиллагааны санамж бичгийг энэ сарын 12-нд талууд үзэглэсэн бөгөөд үйл ажиллагаанд төсөл хэрэгжүүлэгч болон орон нутгийн төлөөлөл оролцсон байна.
Төслийн гол зорилго нь:
-
Бага насны хүүхдийн хөгжлийн бэрхшээлийг эрт илрүүлэх
-
Эрүүл мэнд, боловсрол, нийгмийн үйлчилгээний уялдаа холбоог сайжруулах
-
Төрийн байгууллагуудын чадавх, дэд бүтцийн орчныг сайжруулах
-
Эцэг эх, асран хамгаалагч, олон нийтийн мэдлэг ойлголтыг нэмэгдүүлэх
-
Үндэсний бодлогод тусгах зөвлөмж боловсруулж, дэмжлэг үзүүлэхэд оршиж байна.
Энэхүү төсөл нь хүүхдийн хөгжилд эерэг, хүртээмжтэй, тогтвортой дэмжлэг үзүүлэх суурь тогтолцоог орон нутагт бий болгоход чиглэсэн урт хугацааны чухал алхам болж байгааг талууд онцоллоо.
Эх сурвалж: Хүүхдийг ивээх сан, Баянхонгор аймгийн ЗДТГ
