Монгол Улс, Бүгд Найрамдах Солонгос Улсын хамтарсан хөрөнгө оруулалттай МДМ ампул фарм ХХК нь туншилтай эмийн үйлдвэрлэлд 33 тэрбум төгрөгийн хөрөнгө оруулалт хийж, БНСУ-ын эм үйлдвэрлэлийн зохистой дадал (Korean GMP)-ын шаардлагыг бүрэн хангасан дотоодын “туншилтай эм”-ийн үйлдвэрийг ашиглалтад оруулж байна. 

Энэхүү туншилтай эмийн үйлдвэрийн төслийг анх 2022 онд Монголын эм үйлдвэрлэл, хангамжийн тэргүүлэгч байгууллагуудын нэг Мөнхийн тун ХХК санаачилж, 2024 онд эм хангамжийн ууган байгууллага болох Монгол Эм Импекс Концерн ХХК болон Бүгд Найрамдах Солонгос Улсын Dongkoo Bio&Pharma Co.,Ltd-тай хамтран МДМ ампул фарм ХХК-ийг үүсгэн байгуулж төслийн үйл ажиллагааг үргэлжлүүлснээр өнөөдөр ашиглалтад оруулж байгаа аж.

МДМ ампул фарм ХХК-ийн туншилтай эмийн үйлдвэр нь эмийн импортын хамаарлыг бууруулж, хүн ам, эрүүл мэндийн байгууллагыг эх орондоо үйлдвэрлэсэн чанартай, аюулгүй, эмчилгээний өндөр идэвхтэй эмээр тогтвортой, хүртээмжтэй хангах зорилготой.

Тус үйлдвэр бүрэн ашиглалтад орсноор МДМ ампул фарм ХХК нь жилд дундажаар 20 гаруй нэр төрлийн 60 сая ширхэг туншилтай эм үйлдвэрлэж хүчин чадалтай. Ингэснээр дотоодын зах зээлийн 20 орчим хувийг хангах боломжтой ба хэрэглэгчдэд бүтээгдэхүүнээ зах зээлийн үнээс 15-20 хувь хямд үнээр хүргэх ач холбогдолтой.

Эм, эмнэлгийн хэрэгслийн хяналт, зохицуулалтын газраас гаргасан Эм зүйн салбарын үзүүлэлт-2023 мэдээлэлд тухайн онд нийт 528.2 тэрбум төгрөгийн эмийг импортоор оруулж ирсэн байна.

Эм үйлдвэрлэлийн салбарт 110 шинэ ажлын байр бий болгож, ажиллах хүчийг олон улсад туршлага судалж, мэргэших боломжоор хангахаас гадна БНСУ, БНХАУ, ХБНГУ, Канад зэрэг улсаас олон улсын туршлагатай мэргэжилтнүүд тус үйлдвэрт ажиллаж, эм зүйн салбарын мэргэжилтнүүдийн чадавхийг нэмэгдүүлэн ажиллаж байна.

Цаашид экспортод чиглэсэн үйлдвэрлэл явуулж, олон улсын зах зээлд гарах томоохон зорилттой тул үйлдвэрийг эмийн хатуу зохицуулалттай улсуудын нэг болох БНСУ-ын эм үйлдвэрлэлийн зохистой дадлын стандартын шаардлагад нийцүүлэн барьж байгуулахаас гадна, эмийн өндөр чанартай технологийг сонгож оновчтой нэвтрүүлэхэд онцгой анхаарал хандуулан ажиллаж байна.

МДМ ампул фарм ХХК нь үйлдвэрлэлдээ хаягдал ус, уурын эргэн ашиглалт болон эрчим хүчний хэмнэлтэд суурилсан шийдлүүдийг нэвтрүүлж байгальд ээлтэй үйлдвэрлэлийн шинэ жишгийг бий болгохыг зорьсноороо мөн онцлог аж.