Авлигатай тэмцэх газрын Хяналт шалгалт, дүн шинжилгээний хэлтэс 2025 оны тавдугаар сарын 5-9-ний өдрүүдэд нийтийн албанд томилогдохоор нэр дэвшсэн 743 иргэний хувийн ашиг сонирхлын урьдчилсан мэдүүлгийг шалган, 397 мэдүүлгийг хянан шийдвэрлээд байна. Үлдсэн 346 нэр дэвшигчийн мэдүүлэг одоогоор хяналтын шатанд үргэлжилж байна.

Шалгалтын явцад Төв аймгийн Цагдаагийн газар, Соёл, урлагийн газрын албан тушаалд нэр дэвшсэн зарим иргэдийн хувьд тухайн албан тушаалыг хашихад илт ашиг сонирхлын зөрчил үүсэх нөхцөл байдал тогтоогдож, холбогдох хариуг албан ёсоор хүргүүлжээ.

Өнгөрсөн долоо хоногт иргэн, аж ахуйн нэгж, байгууллагаас нийтийн албан тушаалтны авлига, ашиг сонирхлын зөрчилтэй холбоотой 69 гомдол, мэдээлэл хүлээн авч шалгаснаас 24-г хянан шийдвэрлэсэн байна. Нийслэлийн Хяналт шалгалтын газар, Хөдөлмөрийн аюулгүй байдал, эрүүл мэндийн төв, “Цэнгэг усны нөөц, байгаль хамгаалах төв” зэрэг байгууллагын зарим албан тушаалтан Авлигын эсрэг хууль болон ашиг сонирхлын зөрчлөөс урьдчилан сэргийлэх хуулийн холбогдох заалтуудыг зөрчсөн тул хуулийн хэрэгжилтийг хангах талаар албан бичиг хүргүүлжээ.

Мөн төлөвлөгөөт хяналт шалгалтын хүрээнд гурван албан тушаалтны Хувийн ашиг сонирхлын болон Хөрөнгө, орлогын мэдүүлгийг шалгасан байна. Хяналт шалгалтаар нэр бүхий мэдүүлэг гаргагчид гэр бүлийн гишүүдийн татвар ногдуулах 1.7 тэрбум төгрөгийн орлогоо үнэн зөв тайлагнаагүй байх магадлалтай нөхцөл байдал илэрч, асуудлыг Татварын ерөнхий газарт шилжүүлсэн. Үүний үр дүнд нийт 198.1 сая төгрөгийн нөхөн татвар, торгууль, алданги ногдуулж, зөрчлийг арилгуулах арга хэмжээ авсан байна.

Эх сурвалж: Авлигатай тэмцэх газар