Жил бүр уламжлал болгон зохион байгуулдаг “Ногоон гэрэл, цагаан шугам” тэмцээн энэ жил сургуулийн өмнөх боловсролын байгууллагуудын дунд “Замын хөдөлгөөн цагаан толгой-2025” нэртэйгээр Сэлэнгэ аймагт амжилттай болж өндөрлөлөө.

Энэхүү тэмцээн нь хүүхдийг зам тээврийн ослоос урьдчилан сэргийлэх, хууль эрх зүйн мэдлэг олгох, эцэг эх, асран хамгаалагч нарын үүрэг хариуцлагыг нэмэгдүүлэх, цэцэрлэгийн багш, ажилтнуудын оролцоог хангах зорилготойгоор зохион байгуулагддаг билээ.

Тэмцээнд Сэлэнгэ аймгийн 17 сум, 6 тосгоноос сургуулийн өмнөх боловсролын нийт 13 баг оролцож, авхаалж самбаа, ур чадвар, авьяас чадлаа сорин өрсөлдлөө.

Тэмцээнийг дараах төрлөөр зохион байгуулсан байна:

• Багийн ахлагчийн тэмцээн

• Багийн ахлагчийн командаар гүйцэтгэх жагсаалын үзүүлбэр

• Багийн хамт олны нэгдсэн дуу, бүжгийн үзүүлбэр

Энэ удаагийн тэмцээний онцлох үйл явдал нь байгуулагдаад ердөө гурван жил болсон Сүхбаатар сумын 8-р цэцэрлэгийн бэлтгэл “А” бүлгийн “Аврагч дохиур” баг анх удаа энэхүү тэмцээнд оролцож, олон удаа түрүүлж байсан шилдэг багийг ялж алтан медалийн эзэд болсон явдал байлаа. Уг багийг багш Б.Болорцэцэг удирдан оролцуулсан юм.

“Ногоон гэрэл, цагаан шугам” тэмцээнийг анх 1981 онд Монгол Улсын Гавьяат хуульч, Техникийн ухааны доктор (Ph.D), цагдаагийн бэлтгэл хурандаа Г.Ринчиндорж санаачлан зохион байгуулж байжээ.

Энэхүү тэмцээн нь замын хөдөлгөөний соёл, зөв дадлыг бага наснаас төлөвшүүлэхэд чухал ач холбогдолтой уламжлалт арга хэмжээ болсоор байна.