Монгол Улсын Ерөнхийлөгчийн ивээл дор Төрийн ордонд зохион байгуулагдаж буй “Сувилагч тандаа баярлалаа-2025” улсын зөвлөгөөнд сувилагчид, эрүүл мэндийн салбарын ажилтан, албан хаагчид болон зочид, төлөөлөгчид өргөнөөр оролцож байна. Ерөнхийлөгч У.Хүрэлсүх зөвлөгөөнд оролцож, хүн амын эрүүл мэндийг сахин хамгаалах, өвчнөөс урьдчилан сэргийлэх, эдгээж илааршуулах, сэргээн засах үйл хэрэгт сувилагчдын үүрэг, хариуцлага нэн чухал болохыг онцлон тэмдэглээд, Олон улсын сувилагчдын өдрийн баярын мэндчилгээ дэвшүүллээ.

Тэрбээр төр, засгаас сувилахуйн шинжлэх ухааныг хөгжүүлэх, сувилагч бэлтгэхэд онцгой анхаарч буйг дурдлаа. Сүүлийн жилүүдэд сувилагчийн цалинг 2019 онтой харьцуулахад 1.7-2 дахин нэмэгдүүлж, 2024 оноос орон нутаг, онцгой нөхцөлийн нэмэгдлийг олгож эхэлсэн талаар мэдээлэв. Мөн сувилагч мэргэжлээр суралцагчдад тэтгэлэг олгож, Архангай аймагт энэ намраас Сувилахуйн сургалт, эрдэм шинжилгээ, эрүүл мэндийн тусламж үйлчилгээний төв байгуулах гэж буйг дуулгалаа.

Ерөнхийлөгчийн санаачилгаар сувилагчдыг мэргэшүүлэх, тасралтгүй хөгжүүлэх, эрдэм шинжилгээний ажил хийх нөхцөлийг бүрдүүлэх зорилгоор АШУҮИС-ийн “Сувилахуйн сургалт, судалгааны төв”-ийн бүтээн байгуулалт өнөөдрөөс эхэлж байгааг онцлон дурдав.

Цаашид сувилагчдын тоог нэмэгдүүлэх, нарийн мэргэшил эзэмшүүлэх, мэргэжлийн үнэ цэнийг олон нийтэд сурталчлан таниулах, ажиллах орчин нөхцөлийг сайжруулах, цалин хөлс, нийгмийн баталгааг хангах, тогтвортой ажиллах боломжийг бүрдүүлэхэд төрийн бодлого чиглэх ёстойг Ерөнхийлөгч тэмдэглэлээ.

Манай улс 15 мянга гаруй сувилагчтай бөгөөд энэ нь эрүүл мэндийн салбарын нийт хүний нөөцийн 22 хувийг эзэлдэг. Гэвч 1000 хүнд ногдох сувилагчийн тоо 4.2 байгаа нь олон улсын дунджаас хоёр гаруй дахин бага үзүүлэлт юм. Мөн сүүлийн дөрвөн жилд бэлтгэгдсэн сувилагчдын 47 хувь нь мэргэжлээрээ ажиллахгүй байгаа гэсэн статистик тоо баримт байна.

Зөвлөгөөний үеэр эрүүл мэндийн салбарт хэрэгжүүлж буй бодлого, хувь хүний хөгжлийн илтгэлүүд сонсгогдож, “Эдийн засаг, нийгмийн хөгжилд сувилагч бидний оролцоо” сэдэвт нэгдсэн хэлэлцүүлэг болох юм.

Энэ жил Олон улсын сувилагчдын өдрийг “Сувилагчдаа дэмжиж эдийн засгаа бэхжүүлье” уриан дор дэлхий нийтээрээ 30 дахь жилдээ тэмдэглэж байна.

Эх сурвалж: Ерөнхийлөгчийн Тамгын газар