Монгол, Унгар Улс дипломат харилцаа тогтоосны 75 жилийн ойн хүрээнд Будапешт хотод “Улаанбаатарын соёлын өдрүүд” энэ сарын 10, 11-нд амжилттай зохион байгуулагдаж байна. Нийслэлийн Засаг даргын Тамгын газраас санаачлан хэрэгжүүлж буй уг арга хэмжээ нь хоёр орны найрсаг харилцааг бэхжүүлэх, соёл, эдийн засгийн хамтын ажиллагааг өргөжүүлэх, үндэсний өв соёлоо олон улсад сурталчлах ач холбогдолтой юм.
Соёлын өдрүүдийн хүрээнд “Go Mongolia” үндэсний аялал жуулчлалын брэндийг онцлон сурталчилж, морьт харвааны үзүүлэх тоглолт, жижиг, дунд үйлдвэрлэл эрхлэгчид болон гар урчуудын үзэсгэлэн худалдаа, монгол үндэсний хоолны өдөрлөг, “Монгол-Унгарын түүхийн жимээр” гэрэл зургийн үзэсгэлэн, баримтат киноны нээлт, хүндэтгэлийн нэгдсэн урлагийн тоглолт зэрэг олон сонирхолтой арга хэмжээ Будапешт хотын Маргарет аралд болж байна.
Энэхүү үйл ажиллагаа нь Монголын үндэсний өв соёлыг танилцуулахаас гадна аялал жуулчлал, эдийн засгийн харилцааг шинэ шатанд гаргах, хоёр орны иргэдийн харилцан ойлголцлыг нэмэгдүүлэх чухал ач холбогдолтой хэмээн зохион байгуулагчид онцолж байна.
Монгол, Унгар Улс 1950 оны дөрөвдүгээр сарын 28-ны өдөр дипломат харилцаа тогтоож, 1957 онд хоёр улсын нийслэлд харилцан Элчин сайдын яамаа нээж байсан түүхэн уламжлалтай.
Эх сурвалж: Нийслэлийн Засаг даргын Тамгын газар
