Сэлэнгэ аймгийн Ерөө сум, Хан Хэнтийн дархан цаазат газрын Майн зоо орчимд дөрөвдүгээр сарын 28-ны өдөр гарсан ойн түймрийг бүрэн унтраахаар холбогдох байгууллагууд хүч нэмэгдүүлэн ажиллаж байна.

Түймрийн голомтод Хан Хэнтийн улсын тусгай хамгаалалттай газрын 12 хүн 6 морьтойгоор, нийслэлийн Онцгой байдлын газраас 25 албан хаагч, Мандал сумын Онцгой байдлын газраас 15 хүн, Үндэсний аврах бригадын 5 хүн, Булган аймгийн ОБГ-аас 10 хүн, Мандал сумын аж ахуйн нэгж, байгууллагуудаас 41 хүн, сайн дурын 2 иргэн нийт 110 хүний бүрэлдэхүүнтэйгээр ажиллаж байна. Түүнчлэн түймрийн голомтод Зил-131 автомашин 6, Ланд-76 автомашин 2-ыг ашиглан ажиллаж байгаа юм.

Өнөө өглөө нэмэлт хүчээр Зил-131 автомашин 2, албан хаагч 4, 12 аж ахуйн нэгжээс 23 хүн, нийт 27 хүний бүрэлдэхүүнтэй баг түймрийн голомт руу хөдөлсөн байна.

Одоогийн байдлаар Шарлан голын хойд энгэрүүд, Майн голоос Атаа Шарлан голын бэлчир хүртэлх болон Атаа голын эх хүртэлх бүс нутгийн түймрийг бүрэн унтраасан байна. Харин Майн зоо, Ягаан яа, Гацуурт талын чиглэлд түймэр үргэлжилж байгаа тул эдгээр бүсэд хүч нэмэгдүүлэн ажиллаж, түймрийн тархалтыг бүрэн зогсоохоор зорьж байна.

Онцгой байдлын ерөнхий газар, байгаль хамгаалагчид, орон нутгийн байгууллагууд хамтран түймрийн эрсдэлийг бууруулах, тархалтыг хязгаарлах, бүрэн унтраах чиглэлээр шуурхай арга хэмжээ авч байгаа бөгөөд ой, хээрийн түймрийн эрсдэл өндөр хэвээр байгааг анхааруулж, иргэдийг гал түймрийн аюулаас сэрэмжтэй байхыг сануулж байна.

Эх сурвалж: Онцгой байдлын ерөнхий газар