Орон нутгийн хэвлэл мэдээллийн VI форумыг тавдугаар сарын 4-6-ны өдрүүдэд Орхон аймагт амжилттай зохион байгуулж, 21 аймаг, нийслэлээс 100 гаруй сэтгүүлч оролцлоо. Энэ удаагийн форумыг орон нутгийн хэвлэл мэдээллийн эрх зүйн орчин, сэтгүүлчийн ёс зүй сэдвийн хүрээнд зохион байгуулсан бөгөөд Өмнөговь аймгаас хамгийн олон буюу 11 сэтгүүлч хамрагдсан байна.

Форумын нээлтийн ажиллагаанд МСНЭ-ийн ерөнхий нарийн бичгийн дарга Б.Ууганбаяр, салбарын тэргүүлэгчид, Орхон аймгийн удирдлагууд оролцлоо. МСНЭ-ийн Орхон аймгийн салбарын тэргүүн М.Балжинням нээлтийн үгэндээ, "Хэвлэлийн эрх чөлөөний тухай хуулийн шинэчлэн найруулсан төслийг УИХ-аар хэлэлцэх гэж буй энэ үед орон нутгийн сэтгүүлчид хамтдаа тулгамдсан асуудлаа хэлэлцэн, мэргэжлийн үнэт зүйлсээ хадгалан авч үлдэх нь чухал" гэдгийг онцлов.

МСНЭ-ийн ерөнхий нарийн бичгийн дарга Б.Ууганбаяр "Шинэ хуулийг батлуулахдаа яарахгүй, сайн нягтлан боловсруулж, сэтгүүл зүйн хараат бус байдлыг хамгаалсан, олон ургалч үзэл, олон талт байдлыг хангасан байх ёстой" хэмээн байр сууриа илэрхийлсэн юм.

Орхон аймгийн Засаг дарга Б.Зоригтбаяр форумд оролцогчдод хандаж, “Орон нутгийн хэвлэл мэдээллийн салбар төрийн бодлого, шийдвэрийг иргэдэд хүртээмжтэй хүргэхэд үнэтэй хувь нэмэр оруулж байна. Эрдэнэт хоттой холбоотой мэдээлэл сэтгүүлчдэд нээлттэй байх бөгөөд бид цаашид ч хамтын ажиллагаагаа үргэлжлүүлнэ” гэдгийг тэмдэглэлээ.

Форумын үеэр урилгаар хүрэлцэн ирсэн илтгэгч Ph.D Б.Болормаа “Орон нутгийн хэвлэл мэдээлэл – Олон улсын туршлага”, Ph.D Ж.Цэсэн “Үндэсний аюулгүй байдлыг хангахад олон нийтийн мэдээллийн хэрэгслийн үүрэг”, “Глобал Монголиа” сэтгүүлийн эрхлэгч Х.Хорлоо “Орон нутгаас олон улсад ажиллах боломж”, “Эрдэнэт инфо” сайтын эрхлэгч Э.Одсүрэн “Орон нутгийн хэвлэл мэдээллээр хэрхэн бизнес хийх вэ?” сэдвээр илтгэл тавьж, туршлагаа хуваалцсан юм.

Сэтгүүлчид “Орон нутгийн хэвлэл мэдээллийн өмнө тулгамдаж буй асуудал, гарц шийдэл” сэдвээр хэлэлцүүлэг өрнүүлж, эрх зүйн орчинд тулгамдаж буй асуудлууд, сэтгүүлчдийн аюулгүй байдлыг хангах шаардлагын талаар нээлттэй ярилцлаа. Хэвлэлийн эрх чөлөөний тухай хууль одоогийн нөхцөлд тунхгийн шинжтэй, амьдралд нийцэхгүй байгааг онцолж, шинэчлэлийн ажлыг чанартай хийхийг санал нэгтэй дэмжсэн юм.

Форумын хүрээнд орон нутгийн сэтгүүлчид Эрдэнэт үйлдвэрийн үйл ажиллагаатай танилцаж, улсын нийгэм, эдийн засгийн хөгжилд оруулж буй хувь нэмэр, бүтээн байгуулалтын онцлогтой танилцав. Эрдэнэт үйлдвэр нь долоон мянга орчим ажилтантай, иж бүрэн дэд бүтцийг бүрдүүлсэн, уул уурхайн хариуцлагатай томоохон төслийн жишиг байгууллага гэдгийг онцоллоо.

Орон нутгийн сэтгүүлчид жил бүр энэ мэт форумд оролцож, тулгамдсан асуудлаа хэлэлцэн, бүс нутгийн хөгжил дэвшилтэй танилцдаг уламжлал тогтжээ. Дараагийн буюу VII форумыг Дорноговь аймагт зохион байгуулахаар төлөвлөсөн байна.

Эх сурвалж: Монголын сэтгүүлчдийн нэгдсэн эвлэл