Өглөөний 9:00 цагт Монгол Улсын Ерөнхийлөгчийн ивээл дор “Сувилагч тандаа баярлалаа-2025” зөвлөгөөн Төрийн ордонд эхэлнэ. Үүний хүрээнд 11:30 цагт Ерөнхийлөгч У.Хүрэлсүх АШУҮИС-ийн Сувилахуйн сургууль дээр очиж, “Сувилахуйн сургалт” төвийн бүтээн байгуулалтын нээлтэд оролцоно.

Өнөөдөр олон улсын сувилагчдын өдөр тохиож буй тул эрүүл мэндийн салбарынхны үйл ажиллагаа онцгой анхаарал татаж байна.

Д.Сүхбаатарын талбайд 3х3 сагсан бөмбөгийн аварга шалгаруулах тэмцээн үргэлжилж байгаа бол Монголын Үндэсний музейн үзэсгэлэнгийн танхимд “Үндэсний бичиг-Өв соёл” тусгай үзэсгэлэн тавдугаар сарын 12-ныг хүртэл дэлгэгдэнэ.

Мөн Чингис хаан Үндэсний музейд “Амьд ертөнцийн спектр” сэдэвт биологийн тусгай үзэсгэлэн зургаадугаар сарын 1-нийг хүртэл үргэлжилж байна.

Цэцэрлэгжүүлэлтийн салбартай холбоотойгоор Яармаг дахь IC Park-т Монголын мод үржүүлэг, цэцэрлэгжүүлэлтийн мэргэжлийн байгууллагуудын холбооноос 60 хоногийн турш “Модлог гарден экспо” үзэсгэлэн худалдааг зохион байгуулж байгаа бөгөөд энэ нь зургадугаар сарын сүүл хүртэл үргэлжилнэ.

Орон нутгийн хувьд Сэлэнгэ аймгийн Нийтийн номын сангаас Үндэсний бичиг, соёл номын өдрүүдийг угтан бүх насны иргэдийн дунд Мийм бүтээх цахим уралдаан зарласан бөгөөд энэ уралдаан тавдугаар сарын 20-ныг хүртэл үргэлжилнэ.

Хилийн чанадад АНЭУ-ын Аль-Айн хотод шатрын насанд хүрэгчдийн Ази тивийн аварга шалгаруулах тэмцээн энэ сарын 16-ныг хүртэл үргэлжилж байгаа бөгөөд Монголын шатарчид оролцож байна.

Мөн Чехийн Үндэсний музейд “Чингис хаан” олон улсын үзэсгэлэн зургадугаар сарын 22-ныг хүртэл олон улсын үзэгчдэд дэлгэгдэж байна.