Хөвсгөл аймгийн Засаг даргын нэрэмжит аймгийн аварга шалгаруулах цэрэг спортын “Дөл” цогцолбор тэмцээн өнөөдөр албан ёсоор эхэллээ. Энэхүү тэмцээн нь ерөнхий боловсролын сургуулийн ахлах ангийн сурагчдад цэрэг эх оронч үзэл, хүмүүжил төлөвшүүлэх, эх орноороо бахархах сэтгэл, бие бялдар, сэтгэлзүйн тэсвэр хатуужил олгох, Зэвсэгт хүчний залгамж халааг бэлтгэх зорилготойгоор зохион байгуулагдаж байна.

Тэмцээний нээлтийн үйл ажиллагаанд Хөвсгөл аймгийн Засаг даргын орлогч Ц.Гансүх оролцож, оролцогч сурагчдад спортын өндөр амжилт хүсэн ерөөл дэвшүүллээ.

Тэмцээнд аймгийн ерөнхий боловсролын арван сургуулийн 130 гаруй тамирчин хоёр өдрийн турш нийт 9 төрлийн тэмцээнд оролцож, авхаалж самбаа, бие бялдрын чадавх, сэтгэлзүйн тэсвэр хатуужлаа сорин өрсөлдөх юм. Үүнд:

• Жагсаалын бэлтгэл,

• Гардан тулааны үзүүлэх тоглолт,

• Марш гүйлтийн тэмцээн зэрэг төрөл багтжээ.

Тус тэмцээнийг Хөвсгөл аймгийн ЗДТГ-ын Цэргийн штаб гол зохион байгуулагчаар, Монгол Улсын баатар Л.Даваадоржийн нэрэмжит Хилийн цэргийн 0257 дугаар анги, Онцгой байдлын газар, Зэвсэгт хүчний 321 дүгээр тусгай салбар, Боловсрол, шинжлэх ухааны газар, Батлан хамгаалахад туслах нийгэмлэг хамтран зохион байгуулж байна.

Эх сурвалж: Хөвсгөл аймгийн ЗДТГ