Нийслэлийн Засаг даргын А/237 захирамжийн дагуу зам талбай, автобусны буудал дээр байршуулсан түргэн үйлчилгээний цэгүүдийг (ТҮЦ) нүүлгэн шилжүүлж байгаа нь зарим иргэдийн зүгээс хүний эрх зөрчигдөж байна хэмээн үзэх шалтгаан болж, Монгол Улсын Хүний эрхийн Үндэсний комисст гомдол ирүүлжээ.

Эдгээр гомдлын хүрээнд ХЭҮК-ын гишүүн Б.Энхболд 2025 оны дөрөвдүгээр сарын 25-наас хойш ТҮЦ эрхлэгч иргэдийн төлөөлөлтэй дөрвөн удаа уулзсан байна. Тэрбээр нөхцөл байдалтай газар дээр нь очиж танилцахаас гадна, эсэргүүцэл илэрхийлж шаардлага тавьсан иргэдтэй тогтмол уулзаж, тэдний санал бодлыг сонсож байгааг онцоллоо.

Мөн хоёр талын байр суурийг тэнцвэртэй сонсох зорилгоор нийслэл, дүүргийн удирдлагуудтай уулзалт зохион байгуулж, гомдол гаргасан иргэн бүртэй ганцаарчлан уулзаж, тухайн хүний нөхцөл байдлыг тодруулан бусад боломжит хувилбаруудыг танилцуулж байгаа аж. Цаашид ТҮЦ нүүлгэн шилжүүлэх үйл явцад хүний эрхийг дээдэлж, хуульд нийцүүлэн ажиллах зөвлөмжийг холбогдох байгууллагуудад өгчээ.

Өнөөдөр буюу 2025 оны тавдугаар сарын 8-ны өдөр болсон ТҮЦ эрхлэгч иргэдтэй уулзалтын үеэр ХЭҮК-ын зүгээс нийслэл, дүүргийн удирдлагуудтай өмнө нь санал бодлоо солилцсон эсэх, нөхцөл байдалд өөрчлөлт орсон эсэхийг тодруулсан байна. Комиссоос хуульд заасан чиг үүргийн дагуу иргэдийн гомдлыг үргэлжлүүлэн шалгаж, дүгнэлт гаргах ажлыг явуулж байгааг тайлбарлажээ.

Эх сурвалж: Монгол Улсын Хүний эрхийн Үндэсний комисс