Иргэд бид бүхэнд тодорхой шалтгааны улмаас баримт бичгээ нотариатаар баталгаажуулахаас эхлээд тухайн баримтыг байнгын хадгалах, хэрэгтэй үед заримдаа хаяж гээх тохиолдол гардаг байсан. Харин нотариаттай холбоотой үйлчилгээнүүд цахимд шилжсэнээр баталгаажсан баримт бичгээ шууд цахимаар харах, татаж авах, илгээх боломж бүрдсэн. Гэхдээ иргэдийн хувьд мэдлэг, мэдээллээ хангалттай хэмжээнд авч чадаагүйгээс шалтгаалан биечлэн лавлагаа тодорхойлолт авах тохиолдол хэвээр байна. Үүнтэй холбоотойгоор “И-Монгол академи” УТҮГ, Монголын нотариатчдын танхимтай цаашид цахимжсан үйлчилгээнүүдийг иргэдэд сурталчлах, мэдээ мэдээллийг олон талт сувгаар хүргэх, хүртээмжийг нэмэгдүүлэх чиглэлээр хамтарсан уулзалтыг зохион байгуулсан юм.
Нотариаттай холбоотой эдгээр үйлчилгээнүүд нь хөрөнгө, эрх мэдэл, үүрэг хариуцлага хуваалцаж буй хүн бүрд хэрэг болдог.
E-Mongolia системээс шууд авч болох үйлчилгээнүүд:
- Нотариатаар гэрчлүүлсэн үйлдлийн архивын хуулбар авах
- Нотариатын үйлдэл гэрчлүүлсэн эсэх лавлагаа
- Нотариатаар гэрчлүүлсэн тээврийн хэрэгслийн гэрээний лавлагаа
- Нотариатаар гэрчлүүлсэн итгэмжлэлийн лавлагаа
- Хилийн чанадад үүрэг гүйцэтгэгчээр гэрчлүүлсэн итгэмжлэлийн лавлагаа зэрэг багтаж байна
Нотариатын үйлчилгээ юунд хэрэгтэй вэ?
- Иргэд
- Хувийн өмчөө (газар, байшин, машин) зарж, шилжүүлэхэд;
- Итгэмжлэл хийхдээ (өөр хүнээр төлөөлүүлэхдээ);
- Гэр бүл салалт, гэрлэлт батлах зэрэг эрх зүйн харилцаанд;
- Өв залгамжлалтай холбоотой асуудал шийдвэрлэхдээ;
- Гадаадад сурах, ажиллахдаа бичиг баримтаа баталгаажуулахдаа;
- Бизнес эрхлэгч (ААН, компаниуд)
- Гэрээ хэлцэл байгуулахдаа;
- Үйл ажиллагаагаа хууль ёсны болгоход (түрээс, хамтын ажиллагааны гэрээ г.м.)
- Баримт бичиг, итгэмжлэл, төлөөлөх эрхээ баталгаажуулахдаа;
- Гадаадад зорчих, амьдрах
- Диплом, төрсний гэрчилгээ зэрэг баримтыг олон улсад хүчинтэй болгохдоо;
- Орчуулсан бичиг баримтаа баталгаажуулахдаа;
Иргэн, хуулийн этгээд нь 2022 оны 01 сараас өмнө нотариатчаар гэрчлүүлсэн баримтын талаарх мэдээллийг 11354302 дугаарын утсаар лавлах, итгэмжлэл гэрчилсэн нотариатчийн нэрийг мэдэж байгаа тохиолдолд Монголын Нотариатчдын танхимын notary.mn цахим хуудаснаас тухайн нотариатчийн архивын баримт хаана хадгалагдаж байгаа тухай мэдээлэл авах боломжтой.
