ХӨГЖЛИЙН БЭРХШЭЭЛТЭЙ ЭМЭГТЭЙЧҮҮДИЙН ЦАХИМ ОРОЛЦООГ НЭМЭГДҮҮЛЖ, ЭДИЙН ЗАСГИЙН ЧАДАВХЫГ ДЭМЖИЖ БАЙНА

Европын Холбооны санхүүжилттэй, Цахим Хөгжил, Инновац, Харилцаа Холбооны Яамны дэмжлэгтэйгээр Пипл ин Нийд ОУТББ болон Фаро Фаундэйшн ТББ-ын хамтран хэрэгжүүлж буй “Иргэний нийгмийн байгууллагуудыг чадавхжуулах замаар цахим оролцоог нэмэгдүүлэх нь” (DICE) төслийн үйл ажиллагааг танилцуулж байна. Төслийн ерөнхий зорилго нь Монгол Улс дахь цахим шилжилтийг бүх талын оролцоотойгоор хөгжүүлж, ардчилсан орон зайг өргөжүүлэхэд хувь нэмэр оруулах чадвартай, хараат бус, үр нөлөө бүхий Иргэний нийгмийн байгууллагуудыг бий болгоход оршино. Энэ нь  Монгол Улсын Засгийн газрын “Цахим үндэстэн” стратегийн хүрээнд Иргэний нийгмийн байгууллагуудыг дижитал технологийн тусламжтайгаар нийгмийг хүчирхэгжүүлэх үндсэн үүргээ биелүүлэхэд нь дэмжлэг үзүүлэхийг зорьж байна. Төслийн нэг чухал бүрэлдэхүүн хэсэг нь  Гуравдагч талуудад санхүүгийн дэмжлэг үзүүлэх хөтөлбөр бөгөөд энэ нь иргэний нийгмийн байгууллагуудын үйл ажиллагааг дэмжих замаар:

• Зорилтот бүлгүүдийн дижитал ур чадвар, медиа боловсрол, цахим аюул заналхийллийн талаарх мэдлэг, чадамжийг бэхжүүлэх

• Дижитал технологийн тусламжтайгаар төрийн үйлчилгээний талаарх мэдлэгийг

нэмэгдүүлж, үйлчилгээнд хандах боломжийг өргөжүүлэх

• Дижитал технологийг ашиглан иргэдийн ардчилсан үйл явцад оролцох идэвхийг

нэмэгдүүлэхэд үйл явц юм.

 “Марал-Элч” сан нь дээрх тэтгэлэгт шалгарсан 20 байгууллагын нэг бөгөөд “Хөгжлийн бэрхшээлтэй хүүхэдтэй эхчүүд, хөгжлийн бэрхшээлтэй эмэгтэйчүүдийн цахим ур чадварыг сайжруулах замаар эдийн засгийн эрх мэдлийг нь нэмэгдүүлэх нь” төслийг нийслэлийн алслагдсан дүүргүүд болох Налайх, Багахангай дүүрэгт хэрэгжүүлж уг төсөлд 40 эмэгтэй оролцож байна. “Марал-Элч” сангийн хэрэгжүүлж буй энэхүү төсөл нь зорилтот бүлгийн эмэгтэйчүүдэд ухаалаг утсанд суурилсан цахим ур чадварын сургалтаар дамжуулан гэр бүлийн орлогыг нэмэгдүүлэх, бичил үйлдвэрлэл, жижиг бизнес эрхлэх чадавхыг дээшлүүлэхэд чиглэж буй юм.

Төслийн үйл ажиллагаа нь ухаалаг гар утсанд суурилсан төрийн цахим үйлчилгээг авах, эрүүл мэнд,  банк, санхүүгийн үйлчилгээ авах, цахим орчинд хувийн мэдээллээ хамгаалах, цахим орчинд ёс зүйтэй харилцаанд суралцах, хиймэл оюун ухаанаар өөрт хэрэгтэй мэдээлэл хайх, гар утсаар контент хийж сурах, дижитал маркетинг хийж сурах, биенес ур чадварт суралцах зэрэг юм.

Тус төсөл нь зөвхөн нэг бүлэгт чиглэсэн бус, цаашлаад асрахуйн хөдөлмөр, эдийн засгийн хараат бус байдал, цахим хүртээмжийн тэгш байдлыг хөндөж буйгаараа онцлог юм. Гэр бүлийн хүрээний эдийн засгийн сайжрал нь улс орны нийт эдийн засагт эерэг нөлөө үзүүлэх суурь нөхцөл болдог гэдгийг төслийн баг тодотгож байна.