Явган хүний гарцан дээр дугуйтай хүүхэд мөргөөд зугтсан жолоочийн бичлэг өчигдөр нийгмийн сүлжээнд тавигдсан. Уг хэрэг Сүхбаатар дүүргийн наймдугаар хорооны нутаг дэвсгэрт байрлах Спортын төв ордны урд замд үйлдэгдсэн бөгөөд өчигдөр өглөө 07.00 цагийн орчимд “Автомашины марк, улсын дугаар тодорхойгүй автомашин унадаг дугуйтай зорчигчийг мөргөж, хэргийн газрыг орхиж зугтаасан” гэх дуудлага мэдээлэл бүртгэгджээ.

Цагдаагийн байгууллагаас ослыг шалгахад "Hyundai Elаntra" маркийн автомашиныг насанд хүрээгүй хүн жолоодон явсныг олж тогтоосон байна. Тиймээс тухайн тээврийн хэрэгслийг ачиж саатуулан, шалгалтын ажиллагааг хийж байна. Осол гаргачихаад хэргийн газрыг орхиж явах нь олон сөрөг үр дагаврыг авчирч, хүлээх хариуцлагыг нь нэмэгдүүлдэг. 

Нэг үеэ бодвол манайд камерийн систем хөгжсөн, зугтсан хүнийг барихад маш хялбар болсон. Мэдээллийг хүмүүс хурдан шуурхай өгдөг, хүмүүсийн нийгмийн идэвхи сайн болж байгаа. Тиймээс "Зам тээврийн осол гаргасан бол хэргийн газрыг орхиж битгий зугт. Осол гаргачихаад хэргийн газрыг орхиж явах нь олон сөрөг үр дагаврыг авчирдаг. Хэргийн газрыг орхиж  зугтаасан бол санаатай гэмт хэрэг тооцогдож, хүлээх хариуцлага хүндэрдэг" гэдгийг цагдаагийн байгууллагаас анхааруулж байна..