Монгол Улсын нийт хүн амын 31.5 хувийг 14 хүртэлх насны хүүхэд эзэлж байна. Өнөөгийн хүн амын бүтэц, хүүхдийн тоо, боловсролын хүртээмж, эрхийн хамгааллын түүхэн хөгжлийг авч үзвэл Монгол Улс хүүхдэд ээлтэй бодлого хэрэгжүүлэх чиглэлээр үе шаттай ахиц дэвшил гаргасаар байна.

Монгол Улсын 3 сая дахь иргэн Өмнөговь аймагт төрсөн Монголжин охин бөгөөд энэ түүхэн үйл явдал 2015 оны нэгдүгээр сарын 24-нд тохиосон. Харин хоёр сая дахь иргэн 1988 онд, нэг сая дахь иргэний тоог 1963 онд бүртгэж байжээ. Үүнээс харахад хүн амын өсөлт 1979-1989 оны хооронд 2.9 хувиар өсч оргил үедээ хүрсэн нь эдүгээ боловсролын хүртээмж, хүүхдийн халамжийн үйлчилгээний хэрэгцээг улам бүр нэмэгдүүлж байна.

2024-2025 оны хичээлийн жилийн байдлаар:

• ЕБС: 885 сургууль үйл ажиллагаа явуулж байгаа бөгөөд 705 нь төрийн, 117 нь хувийн өмчийн. Өнгөрсөн хичээлийн жилд бага, суурь, бүрэн дунд боловсролыг нийт 175,700 сурагч эзэмшсэн байна.

• Цэцэрлэг: 1407 байгууллага ажиллаж, 264,818 хүүхэд хамрагдаж байгаа ба нийт бүлгийн тоо 9226 байна.

• Их, дээд сургууль: 65 сургуульд 150,282 оюутан суралцаж байгаа бөгөөд тэдгээрийн 61.4 хувь буюу 92,261 нь эмэгтэй байна.

Монгол Улс хүүхдийн эрхийн хамгаалал, боловсрол, эрүүл мэнд, нийгмийн хамгааллын олон салбарт уялдаа холбоотой бодлогын арга хэмжээг үе шаттай авч хэрэгжүүлсээр ирсэн. Тухайлбал:

• 1925 онд их зохиолч Д.Нацагдоржийн санаачилгаар “Хойчийг залгамжлагч багачуудын байгууллага” нэртэйгээр хүүхдийн байгууллагын үндэс тавигдсан.

• 1991 онд Хүүхдийн төлөө үндэсний төв байгуулагдаж, төрийн байгууллагын хувиар хүүхдийн эрхийг хамгаалах тогтолцоог хэрэгжүүлж эхэлсэн.

• 1989 онд НҮБ-ын Хүүхдийн эрхийн тухай конвенцид Монгол Улс нэгдэн орж, олон улсын эрх зүйн үүрэг хүлээсэн.

• Өнөөгийн байдлаар Хөдөлмөр, нийгмийн хамгааллын яам болон Хүүхэд, гэр бүл, хөгжил хамгааллын ерөнхий газар зэрэг байгууллага Засгийн газрын хэрэгжүүлэгч агентлагийн хэмжээнд хүүхдийн асуудлыг хариуцаж байна.

Эдгээр тоо баримт, үйл явдлууд нь Монгол Улс хүүхдийн эрхийг хангах, ирээдүйгээ бэлтгэхэд хичээл зүтгэл гаргаж ирснийг илтгэж байна.

Эх сурвалж: Үндэсний Статистикийн Хороо, БШУЯ, ГБХЗХГ