Засгийн газрын өнөөдрийн хуралдааны шийдвэрийг танилцуулах үеэр Байгаль орчин, уур амьсгалын өөрчлөлтийн сайд С.Одонтуяа “Тэрбум мод” үндэсний аяны хүрээнд энэ жил хэрэгжих томоохон ажлуудын нэг болох Хархорин хот дахь ногоон төглийг байгуулах талаар мэдээлэл өглөө. Энэ нь тус аяны энэ оны гол төслүүдийн нэг бөгөөд орчны бохирдол бууруулах, уур амьсгалын өөрчлөлтөд дасан зохицох үндэсний зорилтод чухал ач холбогдолтой хэмээн тодотгов.
Мөн энэ жил иргэдийн оролцоог нэмэгдүүлж, “Айл бүр 5 мод” кампанит ажлыг хэрэгжүүлэхээр болсон байна. Өмнө нь энэхүү санаачилгыг төрийн бус байгууллагууд явуулдаг байсан бол 2025 онд нийслэлийн хэмжээнд бүх дүүргийн 108 хорооны 8000 өрхийг хамруулахаар төлөвлөжээ. Энэ хүрээнд зөвхөн томоохон аж ахуйн нэгжүүдээр хязгаарлалгүй өрхийн түвшний бизнес, оролцоог дэмжих нь онцлог аж.
-
Мод тарьсан айл өрх бүр тарьсан модоо E-Mongolia платформд бүртгүүлэх боломжтой болно.
-
Монгол Улсад Хүүхдийн байгууллага үүсэж хөгжсөний 100 жилийн ойтой холбогдуулан хүүхэд бүрийг мод тарихыг уриалж байна.
Энэхүү арга хэмжээ нь ногоон хөгжил, иргэдийн хандлагын өөрчлөлт, хүүхэд, залуусын байгальд хандах хандлагыг төлөвшүүлэх чухал алхам гэж Байгаль орчны яам үзэж байна.
Эх сурвалж: Байгаль орчин, уур амьсгалын өөрчлөлтийн яам
