Монгол Улсын Засгийн газрын “Эрүүл шүд” хөтөлбөрийн хүрээнд Сэлэнгэ аймгийн Засаг даргын 2025–2028 оны үйл ажиллагааны хөтөлбөрт тусгагдсан “Эрүүл шүд” зорилтыг хэрэгжүүлэхийн төлөөх нэгэн чухал арга хэмжээ боллоо. Аймгийн Засаг даргын ивээл дор анх удаа зохион байгуулсан “Сувдан инээмсэглэл” шүд угаалтын аварга шалгаруулах тэмцээн амжилттай болж, шилдгүүдээ тодрууллаа.

Тэмцээн хоёр үе шаттай явагдсан бөгөөд:

• Нэгдүгээр шат: Дөрөвдүгээр сарын 25–29-нд таван бүсэд зохион байгуулагдаж, 34 сургуулийн 4–7 дугаар ангийн 272 хүүхэд оролцсон.

• Хоёрдугаар шат: Шалгарсан 5 бүсийн 10 багийн 80 хүүхэд аймгийн аваргын төлөө өрсөлдсөн байна.

Тэргүүн байрт Сүхбаатар сумын ЕБ-ын 1 дүгээр сургууль,
Хоёрдугаар байрт Зүүнбүрэн сумын ЕБС,
Гуравдугаар байрт Мандал сумын ЕБ-ын 2 дугаар сургууль тус тус шалгарлаа.

Тэмцээний дүнгээр Сэлэнгэ аймагт амбулаторийн үзлэгт хамрагдсан 0–19 насны хүүхдийн шүдний үзлэг 11.9 хувийг эзэлж, насны бүлгээр:

• 5–6 настай хүүхдийн шүд цоорлын тархалт – 2.4%

• 12 настай хүүхдийн шүд цоорлын тархалт – 4%

• 18 настай хүүхдийн шүд цоорлын тархалт – 5.1%

гэж гарсан нь 2024 оны улсын суурь түвшинтэй харьцуулахад 6 настай хүүхдийн шүд цоорлын тархалт 3.6 хувиар бага, харин 12 настай хүүхдийн хувьд 1.9 хувиар өндөр байгаа аж.

Тус тэмцээн нь зөвхөн уралдаан төдийгүй хүүхдүүдэд шүдний эрүүл мэндийн зөв дадлыг хэвшүүлэх, үе тэнгийн нөлөөлөгч сургагч багш бэлтгэх, сургалт сурталчилгааг идэвхжүүлэх чухал хэрэгсэл болж байгаа юм. Цаашид энэхүү тэмцээнийг жил бүр уламжлал болгон зохион байгуулж, шилдэг сурагчдын оролцоог нэмэгдүүлэн “Эрүүл шүдтэй хүүхэд” аяны үр нөлөөг гүнзгийрүүлэхээр төлөвлөжээ.

Эх сурвалж: Сэлэнгэ аймгийн Засаг даргын Тамгын газар