Монгол Улсын Засгийн газрын мөрийн хөтөлбөр болон “Алсын хараа 2050” урт хугацааны хөгжлийн бодлогын хүрээнд, нийслэлийн Хан-Уул дүүргийн 21 дүгээр хорооны нутаг дэвсгэрт БНСУ-ын хөнгөлөлттэй зээлийн санхүүжилтээр хэрэгжиж буй “Солонго-1” болон “Солонго-2” орон сууцны хорооллын барилга угсралтын ажил үргэлжилж байна.

Энэхүү төсөл нь ухаалаг систем, дэвшилтэт технологийг шингээсэн, орлогод нийцсэн нийт 5,002 айлын орон сууцыг хамарч буй бөгөөд төслийг хэрэгжүүлэгч байгууллагаар “Төрийн орон сууцны корпораци” ТӨХХК ажиллаж байна.

Төслийн менежер Х.Содномдэмбэрэлийн мэдээлснээр, сүүлийн үед ТОСК-ийн нэрийг ашиглан иргэдийг “орох жагсаалтад бүртгэнэ”, “орон сууцанд хамруулна” гэх нэрийдлээр залилан мэхлэх тохиолдол ихэсч байгаа тул онцгойлон сэрэмжтэй байхыг уриалжээ.

Тэрбээр “Иргэд та бүхэн итгэж, мөнгөө өгснөөрөө хохирч байна. ТОСК нь цахим хуудсаараа дамжуулан төслүүдийнхээ талаарх мэдээллийг албан ёсоор түгээдэг. Иймд зөвхөн итгэмжлэгдсэн эх сурвалжаас лавлагаа авч, аливаа сэжиг бүхий үйлдэлд автахгүй байхыг дахин сануулъя” хэмээн онцолсон байна.