Эрүүл мэндийн сайдын “Сургуульд суурилсан эрт илрүүлгийн тогтолцоог сайжруулах” бодлогын хүрээнд Архангай аймаг 2025–2026 оны хичээлийн жилд нэгдүгээр ангид элсэн суралцаж буй 1700 гаруй хүүхдийг эрт илрүүлэгт хамруулах бэлтгэл ажлыг бүрэн хангажээ. Уг илрүүлэг нь хүүхдийн бие бялдар, мэдрэхүй, зүрх судас, амны хөндийн эрүүл мэндийг хянах цогц арга хэмжээ юм.

Хүүхдийн эрүүл мэндийн дадалд анхаарсан бас нэгэн чухал арга хэмжээ бол “24/3 шүд угаах аян” бөгөөд хүүхэд бүрийг өдөрт 3 удаа, удаан хугацаанд буюу 3 минутын турш шүдээ угаах хэвшлийг суулгах зорилготой юм.

Эрт илрүүлэг үзлэгийн хэрэгжилтийг сайжруулахын тулд дараах ажлуудыг зохион байгуулж байна:

• Сургалт, чадавхжуулалт:
  Аймгийн бүх ерөнхий боловсролын сургуулиудын эмч, нийгмийн ажилтнуудад 6 настай хүүхдийн хараа шалгах хэрэглэгдэхүүн, нүдний эрт илрүүлгийн талаар хоёр өдрийн сургалтыг зохион байгуулсан.

• Шүд, нүдний үзлэг:
  Сургуулийн эмч, багш нар тусгай хэрэглэгдэхүүн ашиглан хүүхдийн шүд, нүдний үзлэг хийнэ. Илрүүлэгт өөрчлөлт илэрсэн тохиолдолд мэргэжлийн эмчийн хяналтад шилжүүлнэ.

• Зүрхний эмгэг илрүүлэг:
  Хүүхдүүдэд зүрхний цахилгаан бичлэг хийж, мэргэжлийн эмч дүгнэлт гаргана. Илэрсэн тохиолдолд гуравдагч шатлалын эмнэлгийн тусламжид хамрагдах боломжтой.

• Шүдний үзлэг, эмчилгээ:
  Анхан шатны эрүүл мэндийн байгууллагууд хувийн хэвшлийн шүдний эмнэлгүүдтэй хамтран ажиллаж, сургуулиудад шүдний үзлэг зохион байгуулж эхэлсэн. Эмчилгээ шаардлагатай хүүхдүүдийг хоёр дахь шатны үзлэгт хамруулан эмчилнэ.

Энэхүү ажлын хэрэгжилт нь хүүхдийн эрүүл мэндийг эрт үеэс оношилж, сэргийлэх, эрүүл зөв дадал хэвшүүлэхэд чиглэсэн оновчтой бодлогын нэг хэсэг болж байна.

Эх сурвалж: Архангай аймгийн Эрүүл мэндийн газар