Монгол Улсын Ерөнхийлөгчийн 2003 оны 105 дугаар зарлиг, Засгийн газрын 2019 оны 204 дүгээр тогтоолын дагуу жил бүрийн тавдугаар сарын эхний ням гарагийг “Үндэсний бичиг үсгийн баярын өдөр” болгон улс орон даяар тэмдэглэн өнгөрүүлэх уламжлал тогтсон. Энэ жил баярын үйл ажиллагааг Засгийн газрын 2020 оны 96 дугаар тогтоолоор батлагдсан “Монгол бичгийн үндэсний хөтөлбөр III”-ийн хүрээнд зохион байгуулж байна.

Аймаг, сумдын Соёлын төв, Соёл урлаг, аялал жуулчлал, залуучуудын газар, нийтийн номын сан болон төрийн байгууллагуудын хамтран хэрэгжүүлж буй энэхүү арга хэмжээний зорилго нь монгол бичгийг түгээн дэлгэрүүлэх, залуу хойч үед өвлүүлэн үлдээхэд чиглэжээ.

Зохион байгуулж буй үйл ажиллагаанууд:

• ЕБС-ийн сурагчдын дунд уралдаан тэмцээнүүд:

  • “Үндэсний бичгийн хурдан уншигч” шалгаруулах эхний шатны уралдаан

  • “Үндэсний бичгийн сайхан бичигтэн сурагч”, “Тэргүүний уншигч”

  • “Монгол бичгээр хичээнгүй сайхан бичье”

  • “Монгол бичгийн гарал үүслийн тухай мэдлэг олгох сорил”

• Төрийн албан хаагчдад зориулсан үйл ажиллагаа:

  • “Монгол бичгийн уралдаан”

  • “Өв уламжлалаа танин мэдэх, монгол бичгийг хялбар аргаар сурах нь” сэдэвт лекц, сургалт

• Ном, үзэсгэлэн, сургалт:

  • Монгол бичгээр хэвлэгдсэн номын үзэсгэлэн

  • Монгол бичгийн сургалт, танин мэдэхүйн хөтөлбөрүүд

Алтай, Улаанхус, Бугат, Толбо, Буянт, Алтанцөгц, Баяннуур, Цагааннуур зэрэг сумдын Соёлын төвүүд дээр дээрх үйл ажиллагаануудыг үе шаттайгаар зохион байгуулж байгаа нь монгол бичгийн хэрэглээг сэргээж, иргэдийн оролцоог нэмэгдүүлэхэд чухал нөлөө үзүүлж байна.