НҮБ-ын Монгол Улс дахь суурин төлөөлөгч Яап ван Хейрдэн энэ сарын 3-4-ний өдрүүдэд Дундговь аймагт ажиллаж, тус бүс нутагт хэрэгжиж буй хүүхэд хамгаалал, хөдөлмөр эрхлэлт, байгаль орчны чиглэлийн төслүүдтэй танилцлаа. Түүнтэй хамт НҮБ-ын Суурин зохицуулалтын газрын мэдээлэл харилцааны ажилтан Д.Соёлмаа болон ГХЯ-ны төлөөлөгч С.Саруул-Ухаан ажилласан юм.
Аймгийн ИТХ-ын дарга Ж.Мөнхчулуун, Засаг дарга С.Мөнхчулуун тэргүүтэй удирдлагуудтай уулзах үеэр НҮБ-ын зүгээс хэрэгжүүлсэн “Ид шидийн орон Дундговь” хүүхдийн хөгжил хамгааллын төвийн үйл ажиллагаатай танилцаж, ЮНИДО-гийн дэмжлэгтэй хөдөлмөр эрхлэлтийн төслүүдийн үр дүнг хэлэлцэв. Мөн суурин төлөөлөгч гэр бүлийн хамтаар Гуяаны төгөлд мод тарьсан нь байгаль орчныг хамгаалах үйлсэд бэлгэдэлтэй үйлдэл болжээ.
Засаг дарга С.Мөнхчулуун уулзалтын үеэр НҮБ-ын санхүүжилтээр хэрэгжсэн олон төслийн үр дүнг онцолж, цөлжилтийг сааруулах, нийгэм, эдийн засгийн бүхий л салбарт хамтын ажиллагаагаа өргөжүүлэх хүсэлтэй байгаагаа илэрхийлсэн бол Яап ван Хейрдэн энэ чиглэлд НҮБ дэмжиж ажиллана гэдгээ мэдэгдлээ.
Энэхүү айлчлалын үр дүнд 2026 онд Монгол Улсад болох НҮБ-ын Цөлжилттэй тэмцэх тухай конвенцын Талуудын 17 дугаар бага хурлыг угтан “Залуу малчдын чуулга уулзалт”-ыг 2025 оны зургадугаар сарын 16, 17-нд Дундговь аймагт зохион байгуулахаар болсон тухай тус аймгийн ЗДТГ мэдээлэв.
