Хөвсгөл аймгийн Засаг дарга Л.Төмөрбаатарын санаачлагаар үндэсний хувцасны хэрэглээг тэлж, өв соёлоо түгээн дэлгэрүүлэх зорилгоор сар бүрийн эхний даваа гарагийг үндэсний хувцастай өдөр болгон хэвшүүлэх уриалга гаргасан байна. Энэ санаачлагын хүрээнд Арбулаг сумын ИТХ, ЗДТГ-ын хамт олон тогтмол үндэсний хувцсаа өмсдөг болжээ.
Монголчууд ихэвчлэн цагаан сар, наадам зэрэг баярын үеэр дээлээ өмсдөг ч энгийн үед өмсөх нь ховор. Харин энэ удаагийн уриалга нь хүүхэд, залуучуудад үндэсний хувцсыг өдөр тутмын хэрэглээ болгох соёлыг төлөвшүүлэх, соёлын үнэт зүйлсээ хадгалах, уламжлалаа залгамжлуулах ач холбогдолтой юм.
Монгол үндэсний хувцас олон зууны түүхтэй. Зуны улиралд тэрлэг, хавар намартаа хөвөнтэй болон хурган дээл, өвөл нь нэхий дээл өмсдөг уламжлалтай. Мөн дээлийг бүсэлснээр биедээ хэрэгцээт зүйлс болох хэт хутга, тамхины уут, гаансны уут зэргийг авч явах боломжтой байжээ. Ийм уламжлалт хэрэглээ, гоёлын агуулгыг орчин цагт сэргээхэд дээрх уриалга дэм болж байна.
