Дархан-Уул аймагт анх удаа зохион байгуулагдсан “Жендэрийн мэдрэмжтэй Дархан” видео контентын уралдаан амжилттай болж, шилдэг бүтээлүүдээ шалгарууллаа. Тус уралдааныг аймгийн Жендэрийн салбар хороо санаачлан зохион байгуулсан бөгөөд 10 гаруй бүтээл ирснээс шилдэг гурван контент тодорсон юм.

Уралдаанд оролцогчид “Жендэр гэж юу вэ?” гэсэн асуултад өөр өөр өнцгөөс хариулт өгч, хүүхэд, гэр бүл, сургуулийн орчинд жендэрийн ойлголт хэрхэн хамааралтайг харуулсан байна. Ялангуяа хүүхдүүд эцэг эх, найз нөхдийн тусламжтайгаар жендэрийн тухай ойлголтоо бүтээл болгон илэрхийлснээр уралдааны онцлогийг илтгэжээ.

Шилдэг бүтээлүүдийн онооны дараалал:

• Тэргүүн байр (74 оноо) – Дархан сумын 6-р багийн иргэн Б.Нямбатын гэр бүл. Тэд гэр бүлийн нөхцөл дэх жендэрийн тэгш байдлын тухай хөндөж, гэр орны ажилд хүйсээр ялгалгүй харилцан тусалж хамтран оролцох тухай өгүүлсэн бүтээлээрээ түрүүлжээ.

• Дэд байр (61 оноо) – “Од” сургуулийн 8-4 ангийн сурагч О.Оюунзул, 3-1 ангийн сурагч О.Итгэл нар төрсөн эгч дүүсийн хувиар нэгдсэн бүтээлээр оролцсон. Тэд жендэрийн үүсэл, түүх болон хүүхэд, сургуулийн орчинд жендэрийн эрх тэгш байдал хэрхэн чухал болохыг харуулжээ.

• Гутгаар байр (56 оноо) – “Оюуны-Ирээдүй” сургуулийн 10-7 ангийн сурагч Т.Энххүслэн болон түүний найзууд жендэрийн талаарх ойлголтоо бүтээлч байдлаар илэрхийлсэн контентоороо шалгарчээ.

Аймгийн Жендэрийн салбар хороо нь 2022 оны 01-А/342 тоот захирамжаар 19 хүний бүрэлдэхүүнтэйгээр шинэчлэгдэн байгуулагдсан бөгөөд 2024 оны арванхоёрдугаар сард жендэрийн нөхцөл байдлын судалгаа хийж, олон нийтийн мэдлэг ойлголтыг нэмэгдүүлэх зорилгоор энэхүү уралдааныг хоёрдугаар сард зарласан байна. Тэмцээний дүнг баасан гарагт гаргаж, шагналыг аймгийн Засаг даргын орлогч Б.Жавхлан болон салбар хорооны гишүүд гардуулжээ.

Цаашид Жендэрийн салбар хорооноос иргэд, аж ахуйн нэгжүүдэд зориулсан шат дараалсан сургалтуудыг зохион байгуулах төлөвлөгөөтэй байгааг мөн мэдээлсэн байна.

Эх сурвалж: Дархан-Уул аймгийн Жендэрийн салбар хороо